Ministru Obra Públika, Abel Pires da Silva halo diálogu ho komunidade BTN II Tasi-tolu, sábadu (07/05). Imajen/MOP

DILI, 09 maiu 2022 (TATOLI)—Komunidade BTN II Tasi-tolu autoriza ona kompañia Jonize Unip, Lda, harii valeta foun hosi Terminál Tasi-tolu bá tasi, ne’ebé tama pakote ida ho projetu emerjénsia konstrusaun estrada Tasi-tolu.

Konkordánsia ne’e hafoin Ministru Obra Públika (MOP), Abel Pires da Silva, akompaña hosi Diretór Nasionál Estrada Ponte no Kontrolu no Seias (DNEPCC, sigla portugés), Nene Lobato, no Tékniku Supervizór sira halo diálogu ho komunidade lokál iha sábadu (07/05), ne’ebé antes ne’e la simu kompañia harii valeta foun.

“Ha’u iha ne’e hamutuk ho imi, hodi defende direitu tanba ho razaun defende interese komunidade mak estrada ne’e ita halo, tanba estrada ne’e loloos trosu ho medida metru 700, la’ós uza osan Governu, maibé loloos dezeñu inísiu ho osan empréstimu hosi Banku Dezenvolvimentu Aziátiku (ADB), ita tau oituan sira mak halo kontrolu. Tanba ita tenke halo lisensa ambientál, nune’e ita presiza foti desizaun hodi estrada ne’e hadi’a hodi bee dalan ne’e redús risku ba inundasaun,” Ministru hateten durante diálogu, hanesan haktuir iha nota ne’ebé Agência Tatoli asesu, segunda ne’e.

Notísia relevante: Semana ne’e, kompañia Jonize sei halo reabilitasaun estrada Tasi-tolu

Parte BTN II Tasi-tolu presiza tau bee-dalan tanba estrada badak no bainhira tempu udan bee foer halai hotu ba komunidade nia hela fatin, entaun intensaun tau bee dalan hodi bele halai tuir nia dalan bá liu tasi.

“Ha’u konkorda ho ita-boot sira katak bee hosi parte sorin, Rai-kotu ne’e ita tenke halo intervensaun atu bee labele halai hotu mai BTN II, nune’e ita sei halo tan bee dalan ida molok Rai-Kotu, ita bele halo tan ida iha área kuarentena tuun ba tasi hodi redús presaun mai hotu iha BTN II Tasi-tolu, maibé ha’u presiza autoridade lokál sira ajuda ami atu ita bele rezolve komunidade nia uma,” Ministru akresenta.

Nune’e, ekipa MOP halo survey ona bee-dalan tuun bá kuarentena ne’e defísil tebes, tanba ba sorin ladi’ak no ba loos ladi’ak tanba kona uma hotu, ne’ebé bainhira parte hotu serbisu hamutuk, bele rezolve uma iha ne’ebá no fó tratamentu di’ak, atu bele fó interese komum bele la’o di’ak tanba estrada ne’e mosu atu redús risku ba inundasaun.

“Kona-ba valeta lokál, ita iha razaun rua tenke hadi’a, tanba inundasaun no risku ba moras dengue. Tinan ne’e akontese dengue ba ita-nia oan sira barak tebes, balun dalaruma lakon oan, tanba ne’e ha’u mai husu autoridade lokál sira, ha’u-nia inan-aman sira, ajuda ministériu atu ita provizóriu hamoos valeta sira, tanba fundu maihosi ministériu maibé serbisu hamutuk ho komunidade hodi ita rezolve problema rua,” nia dehan.

Iha diálogu ne’e, komunidade hato’o preokupasaun kona-ba problema tasi sa’e, tanba bainhira halo valeta iha fatin ne’e bele provoka tasi sa’e.

Hatan ba preokupasaun ne’e, parte MOP komprometidu sei rezolve maibé agora foku uluk ba hadi’a estrada tanba bainhira infraestrutura ne’e ho di’ak, sei redús risku ba inundasaun.

“Agora kona-ba kestaun tasi bele sa’e, ita rezolve ida-idak, ita rezolve uluk estrada hafoin tékniku sira halo estudu no halo prevensaun tasi sa’e ne’e oinsá,” nia tenik.

Hafoin iha konkordánsia, kompañia Jonize Unip Lda sei halo konstrusaun valeta iha BTN II Tasi-tolu maibé komunidade husu MOP atu tau-matan ba problema bee-moos inklui konstrusaun estrada urbana iha bairru ne’e.

Iha fatin hanesan, Ministru orienta tékniku sira hosi DNEPCC halo estudu no dezeñu hodi tau ba planu iha Orsamentu Jerál Estadu (OJE) 2023 nian, inklui sei fó instrusaun ba Bee Timor-Leste, Empreza Públika (BTL, E.P) atu rezolve problema bee-moos iha Tasi-tolu.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here