Tebe-dahur. Imajen: Wikimedia commons

COVALIMA, 09 maiu 2022 (TATOLI)—Tilomar-oan liu-liu veteranu no funsionáriu públiku sira iha postu administrarivu Tilomar, deside hodi kontribui $5,00 atu realiza atividade anima komunidade liuhosi ‘Tebe Oras Naruk’ no ‘Dada Tali, hodi komemora loron independénsia Timor-Leste ba dala-XX.

Administradór postu administrarivu Tilomar, Benedito Maia, hateten osan ne’ebé veteranu no funsionáriu públiku hosi Tilomar-oan sira kontribui ne’e inisiativa mai hosi xefe suku sira hodi anima komunidade sira ho atividade kulturál hanesan “tebe Oras Naruk” no atividade desportu tradisionál ho “Dada Tali”.

Administradór postu administrativu Tilomar, Benedito Maia. Imajen Tatoli/Celestina Teles.

“Atividade ne’ebé atu realiza bazea ba rezultadu enkontru konfirmasaun tuir ha’u-nia hanoin, karik orsamentu la sufisiente atu realiza atividade kultrural ne’e. Tanba ami iha programa atu halo tebe oras naruk, nune’e ita bele fó netik biban ba katuas no ferik sira haksolok no dada tali. Entaun, funsionáriu públiku no veteranu sira ema na’in-ida kontribui osan $5,00,” Benedito Maia hateten ba jornalista sira iha edifísiu postu administrativu Tilomar, segunda ne’e.

Veteranu no funsionáriu públiku sira kontribui osan ne’e, ida-ne’e ideia mai hosi xefe suku sira nune’e bele ajuda Governu hodi anima komunidade komemora loron restaurasaun independénsia ne’e ddomin no dame.

Autoridade munisipál no autoridade lokál realiza atividade “Tebe Oras Naruk” no “Dada Tali” ne’e, orsamentu la’ós mai hosi Governu maibé mai hosi xefe suku, veteranu no funsionáriu públiku sira-nia kontribuisaun hodi apoiu Governu festeza eventu importante ida-ne’e.

“Ita seidauk rona osan tama ona ka seidauk, maibé kontribuisaun sira-ne’e hala’o daudaun ona. Funsionáriu no veteranu sira-nia kontribuisaun hodi soe hamutuk osan $5.00 ne’e, la’ós obriga maibé mai hosi sira-nia inisiativa rasik atu halo rame festa boot ne’e,”  nia dehan.

Atividade kulturál “Tebe Oras Naruk” no atividade desportu tradisionál “Dada Tali” ne’e, komisaun organizadora sira sei fó oras, la haree ba manan ka lakon maibé sira sei hetan hotu, nune’e bele fó motivasaun ba komunidade.

Aleinde realiza atividade kulturál sei realiza mós ativadade desportu komunitária hanesan volley ball no futeból.

“Konforme ami-nia komisaun hala’o enkontru sira seidauk define loron bainhira mak atu realiza atividade desportu sira hanesan volley ball no futeból,” nia relata.

Dadus hosi postu administrativu Tilomar, tuir resensiamentu populasaun hosi suku tinan 2022 ne’e, populasaun hosi suku Beiseuk hamutuk 3,106 ne’ebé kompostu hosi mane 155 no feto 1,556, suku Lalawa hamutuk 2,018 ne’ebé kompostu hosi mane 1073 no feto 945, suku Casabauk hamutuk 2,3356 ne’ebé kompostu hosi mane 1200 no feto 1,151 no suku Maudemo ne’e populasaun hamutuk 3, 473 ne’ebé kompostu hosi mane 1,734 no feto 1,739.

Jornalista : Celestina Teles

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here