INDDIKA IP, introdús papél direitu-devér labarik ba estudante Kátolika Oé-Cusse. Imajen Tatoli/Abílio Elo Nini.

OÉ-CUSSE, 09 maiu 2022 (TATOLI) – Institutu Nasionál Defeza Direitu Labarik, Institutu Públiku (INDDIKA,IP), segunda ne’e halo sensibilizasaun kona-ba direitu no devér labarik ba estudante Sekundáriu Katolika Santo António Oé-Cusse.

Iha intervensaun, Diretora INDDIKA, IP, Dinorah Granadeira, informa, bazea legalidade nian, Estadu Timor-Leste konságra ona katak, labarik hotu ho tinan 0 to’o antes 18, iha direitu ba sobrevivénsia, direitu ba protesaun, direitu ba dezenvolvimentu no ikusliu maka direitu ba partisipasaun.

“Labarik hotu iha Timor-Leste iha direitu asesu ba edukasaun, direitu ba ai-han ne’ebé maka di’ak ba nutrisaun, direitu asesu ba sentru saúde sira, direitu atu estuda iha uma, direitu hetan fasilidade iha uma laran ne’ebé inan fasilita, direitu hetan domin hosi inan-aman no direitu atu halimar iha tempu livre,” Dinorah Granadeira ko’alia iha eskola sekundáriu Santo António Oé-Cusse.

Nia informa, iha direitu haat ne’ebé maka Estadu Timor-Leste konsagra ona presiza kumpri, maka eskola iha territóriu gratuita, maibé balun kuandu eskola iha privada tenke kontribui, tanba nia regulamentu ketak, maibé Estadu kria eskola públiku sira atu responde ba direitu fundamenta labarik nian.

Polítika seluk, maka iha obrigatóriu ba labarik eskola sira, katak bainhira labarik ida to’o ona tinan eskola, nia tenke ba eskola, Ministériu Edukasaun Juventude no Desportu (MEJD) maka na’in polítika ida-ne’e.

Nune’e mós, iha prosesu aprendizajen la autoriza uza violénsia, ida-ne’e mós iha polítika ida ne’e, maibé la’os de’it profesór dada bosok de’it labarik nia tilun ba keixa direitu iha parte judisiáriu.

“Labele hanoin katak ita iha direitu maibé uza buat hotu, tuir ita-nia direitu haluha tiha imi-nia devér, maibé presiza hatene katak, direitu maibé hanesan labarik iha obrigasaun no devér atu halo buat ida tenke tuir nia dalan,” nia hateten.

Iha parte seluk, Estadu Timor-Leste atu responde maka fasilidade saúde gratuita, ne’e obrigasaun Estadu nian atu responde ba direitu labarik sira, katak bainhira ita moras ba sentru fasilidade saúde gratuita, karik inan-aman iha kbi’it finanseiru natoon, bele asesu iha fasilidade privada sira.

Purtantu, kona-ba devér, nu’udar labarik hanesan estudante iha devér maka tenke estuda, respeitu profesór inan-aman no kolega sira inklui sosiedade tomak, no kumpre saida mak inan-aman ko’alia, labele fuma no hemu tua bainhira idade sei labarik.

“Ida-ne’e la’os inan-aman kontra ita-nia direitu, maibé devér hanesan labarik ita tenke kumpre, mensajen ne’ebé dehan ne’e, atu regula labele uza direitu ne’e sala, hanesan mós iha eskola, direitu la’ós livre hato’o espresaun, livre mai eskola, maibé direitu atu hetan matéria no buat hotu la’o tuir regulamentu, iha oras no iha regulamentu eskola nian tenke kumpre,” nia katak.

Reprezentante diretór eskola sekundáriu Santo António Oé-Cusse, Arsélino da Cunha Bobo, orgullu tanba bele partilla informasaun ba estudante sira, nu’udar jerasaun ba futuru.

“Tanba iha Timor-Leste labarik barak mak abandona eskola, hodi hili dalan ba vida negósiu liuhosi faan sasán iha dalan,” nia orgullu.

Entretantu, sensibilizasaun ne’e hala’o durante loron ida, realiza diálogu aberta husu no hatan, partisipa iha sensibilizasaun estudante kauze na’in-500 resin inklui profesór.

Jornalista       : Abílio Elo Nini
Editór             : Evaristo Soares Martins

PUBLISIDADE HUSI MTCIiklan