INCSIDA realiza kampaña HIV- SIDA iha eskola Kátolika Oé-Cusse. Imajen Tatoli/Abílio Elo Nini.

OÉ-CUSSE, 09 maiu 2022 (TATOLI) – Institutu Nasionál Kombate Human Immunodeficiency Virus-Síndrome da Immunodeficinecy Adquirida (HIV-SIDA), Institutu Públiku (INCSIDA, I.P), daudaun ne’e rejista ona sidadaun Timor-Leste infetadu ba virus HIV-SIDA hamutuk ema na’in-1.526.

Prezidente INCSIDA, I.P, Atanasio de Jesus, esplika dadus ne’ebé rejista Institutu Nasionál Kombate Kombate HIV-SIDA, hamutuk ema na’in-1.526, ne’ebé rekolla hosi 12 munisípiu inklui RAEOA.

“Mesak ema Timor-oan de’it hamutuk na’in-1.526, no na’in-166 mate ona, halo hela tratamentu ai-moruk ARB iha 719, dadus seluk iha balu sei pozitivu hela maibé lakohi koopera ho fasilidade saúde,” Atanasio de Jesus, ko’alia iha kampaña nasionál HIV-SIDA ne’ebé hala’o iha eskola Santu António Oé-Cusse, segunda ne’e.

Nia informa, hirak-ne’ebé halai lakon ka lakohi koopera ho fasilidade saúde, maibé parte saúde rejista ona sira-nia identidade, hela fatin, daudaun ne’e profisionál saúde sira kontinua buka-tuir sira-nia paradeiru, atu nune’e hakbesik fali ba fasilidade hetan tratamentu.

“Kuandu ema sira-ne’e ita la fó tratamentu, neineik sei aumenta liutan dadús atu halo infesaun, maibé kuandu sira halo tratamentu entaun ita sei trava volume infesaun,” nia katak.

Atu kontribui redus dadus ne’e, daudaun ne’e INCSIDA, I.P hamutuk ho Ministériu Saúde servisu maka’as liuhosi sensibilizasaun iha kada munisípiu, ba eskola, komunidade no instituisaun públiku nune’e bele habelár nafatin informasaun atu redus kazu ne’e,

Tanba Iha Timor-Leste nia espalla ona iha komunidade nia leet, virus ne’e rasik la’ós sai ona virus privadu ba ema ida, maibé sai virál ona iha territóriu nasionál ba munisípiu 12 no RAEOA, no RAEOA asumi posizaun haat hosi 13 munisípiu.

Entaun estudante sira hanesan jerasaun ne’ebé Estadu presiza tebes, atu fó protesaun ba ita bo’ot sira, nune’e alin sira labele monu iha risku nia laran, iha Timor labarik idade hosi 14 to’o 24, kuaze 30% infetadu ba iha virus HIV-SIDA, entaun ne’e juven la’os prepara nasaun ba futuru maibé juven falla ona,

Tan ne’e maka Estadu Timor-Leste tau atensaun maka’as ba iha virus HIV-SIDA, aliende Ministériu Saúde rasik, iha ona programa HIV-SIDA maibé sei kria tan institutu ida hodi tau matan espesiál ba virus ne’e, nune’e bele ko’alia ba iha públiku sira katak labele halo atividade ransu livre, labele halo atividade sexu livre no labele envolve an iha droga.

Responsável programa HIV-SIDA Oé-Cusse, Celia R. Martins Bobo, kazu HIV-SIDA ne’ebé rejista iha Oé-Cusse hahú kedan iha 2013 to’o 2022 hamutuk 39.

“Dadus iha Oé-Cusse rejista hosi 2013 hamutuk kazu 39, kazu ne’e espalla iha sub-rejiaun haat, Oésilo Pássabe, Nítibe no Pante Makasar, no iha mate na’in-10, no iha tinan 2021 ami hetan na’in-10, agora tinan ne’e foin tama trimestre dahuluk rejista ona na’in-haat (4), aumenta abríl to’o agora hetan ona na’in-rua (2) hamutuk neen (6),” nia katak.

Nia fó-sai katak, kazu ne’ebé durante hetan, liuhosi teste raan ba inan-isin rua, balu voluntariamente ba koko rasik iha fasilidade saúde, nomoos iha pasiente TBC no moras seluk, profisionál halo kolaborasaun hamutuk nune’e bele asesu teste ba HIV-SIDA.

Tanba dalaruma hatudu uluk síntoma hosi moras seluk, entaun parte saúde mós hetan kazu balu hosi ne’e, nune’e nia husu atu hakbesik bebeik ba fasilidade saúde no hadok an hosi sexu livre.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here