INCSIDA, IP, kapasita profisionál Oé-Cusse mellora atendimentu HIV-SIDA. Imajen Tatoli/Abílio Elo Nini.

OÉ-CUSSE, 09 maiu 2022 (TATOLI) – Institutu Nasionál Kombate Human Immunodeficinecy Virus-Síndrome da Immunodeficinecy Adquirida (HIV-SIDA), Institutu Públiku (INCSIDA, I.P), servisu hamutuk ho Ministériu Saúde (MS) fasilita formasaun hasa’e sistema kualidade serbisu pesoál saúde hodi garante atendimentu HIV-SIDA iha Rejiaun Administrativa Espesiál Oé-Cusse Ambeno (RAEOA).

Prezidente INCSIDA, I.P, Atanasio de Jesus, objetivu formasaun ne’e atu fortifika profisionál saúde hodi garante akonsellamentu ba atendimentu HIV-SIDA, hodi responde ba pasiente sira-nia preokupasaun.

“Iha Timor-Leste kazu ne’e kada tinan sa’e, ita mós simu lamentasaun hosi pasiente pozitivu sira katak ita-nia atendimentu seidauk di’ak, entaun persiza kapasita profisionál sira hodi proteje-aan uluk, mak foin trata pasiente sira, tanba profisionál mós iha feen la’en no oan iha uma lakohi sai vítima, tán ne’e mak formasaun ne’e tenke tau ba prioridade hodi proteje ita-nia pasiente sira,” Atanasio de Jesus, ko’alia iha abertura formasaun iha Padimau, Oé-Cusse, segunda ne’e.

Nia husu atu manetin komunikasaun ho pasiente HID-SIDA bainhira realiza atendimentu, nune’e bele garante atendimentu di’ak hodi hakbesik beibeik iha fasilidade saúde hodi kombate virus ne’e.

Reprezentante Ministériu Saúde (MS) hosi Unidade Nasionál HIV-SIDA, David Verdiál, konsidera formasaun ne’e importante rekursu umanu ne’ebé hakna’ar an iha Ministériu saúde, persiza kapasitasaun ba melloramentu serbisu.

“Mellora nafatin ita-nia profisionál sira iha kapasitasaun, ita tenke kapasita atu halo serbisu iha fatin tuir mata dalan no matéria ne’ebé ita hetan ona iha formasaun ne’e, entaun ita tenke sai na’in ba programa ne’e iha faze tratamentu nian,” nia katak.

Diretóra Servisu Saúde RAEOA, Lolita Lay do Santos, reprezenta autoridade Oé-Cusse agradese ba Governu sentrál, tanba fasilita formasaun ba profisionál saúde sira iha RAEOA.

Nia espera liuhosi formasaun ne’e, bele apoia ona profisionál sira-nia kapasidadae no koñesimentu, hodi hatudu atendimentu kualidade iha sosiedade.

Formasaun ne’e hala’o durante loron tolu hahú segunda 09 to’o kurta 11 maiu ne’e, hodi envolve profisionál sira hamutuk na’in 50-resin mai hosi fasilidade saúde sub-rejiaun haat, Oésilo, Pássabe, Nítibe no Pante Makasar inklui Hospitál Referál Oé-Cusse.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here