Grupu estudante Isar Bandeira uainhira tama iha formatura. .Imajen/Antonio Goncalves.

DILI, 09 maiu 2022 (TATOLI)—Koordenadór Sesaun Korpu Isár Bandeira, Valente de Fátima Miranda, informa estudante na’in-68 hosi ensinu sekundáriu lima iha Dili mak Komisaun Organizadora indika sai Korpu Isár Bandeira hodi responsabiliza ba komemorasaun 20 maiu. 

Notísia Relevante: Ramos Horta propoin konvida bainaka espesiál no líder mundiál 18

Grupu estudante isar bandeira na’in-68 halo hela treinamentu. Imajen Tatoli/Osória Marques.

“Ita-nia Korpu Isár Bandeira ba komemorasaun loron 20 maiu 2022, estudante hamutuk 68 maihosi eskola lima iha kapitál Dili. Embora ita haree moras COVID-19 ne’e redús ona maibé ami buka atu evita nafatin, nune’e ita deside eskola lima iha kapitál Dili hodi sai responsável ba eventu komemorasaun loron 20 maiu ne’e,” Koordenadór ne’e hateten ba Agência TATOLI, iha Otél Leo Kase, Dili, segunda ne’e.

Atu evita moras COVID-19, responsável ne’e hateten, sei la involve estudante hosi eskola hotu-hotu iha territóriu Timor-Leste, entaun komisaun organizadora deside hodi eskolla de’it estudante sira hosi eskola sekundária lima iha kapitál Dili.

Estudante hosi Ensinu Sekundáriu lima ne’ebé mak responsabiliza ba eventu ida-ne’e mai hosi Eskola Sekundária Amigo de Jesus São José Operário, Cristal, 10 de Dezembro no Ensinu Sekundáriu Nicolau Lobato.

Hosi eskola lima ne’e, estudante hamutuk 68 ne’ebé kompostu hosi feto 39 no mane 29, ne’ebé enkaixa mós iha laran hosi membru antigu korpu isár bandeira hamutuk 23. Hosi númeru ne’e, na’in-20 sei junta ho formatura hodi hasa’e-hatun bandeira no sira seluk fó asisténsia.

Entretantu, nia dehan, formasaun ba estudante sira-ne’e hahú iha 07 maiu ne’ebé kada tinan involve treiandór hosi FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL).

Tanba, tuir nia, treinadór hirak-ne’e treinadu iha Metinaro no treinadór ne’e hamutuk ema na’in-neen (6) no mós Korpu Isár Bandeira maihosi F-FDTL hamutuk na’in-haat (4).

“Tanba ne’e, ohin treinadór sira ho ami hamutuk iha hotu ona iha ne’e, atu fó treinamentu oinsá mak fizikamente, mentalmente no konesimentu ba estudante sira-nian kona-ba konfigurasaun formatura iha Isár Bandeira ne’e,” nia hateten.

Kritériu própriu ba Korpu Isár Bandeira mak ema ho postura aas liu-liu estudante sira-ne’e nia altura tenke 172 no badak 160, ida-ne’e vale ba feto no mane.

“Kona-ba postura fizika, ita haree ba nia liman no ain inklui matan. Nia ain labele hanesan  letra X ka O no matan labele minus (-) no nia nehan labele maleet (nehan labele hamriik dook malu). Ida-ne’e ami halo no sai kritériu ida ba Korpu Isár Bandeira, tanba ita hakarak uniforma iha eventu ne’e,” nia hateten.

Notísia Relevante: Governu aloka millaun $1,6 ba serimónia toma pose PR eleitu

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here