Primeiru Ministru, Taur Matan Ruak, prezide reuniaun Konsellu Ministru, iha Palásiu Governu. Imajen Tatoli/Francisco Sony

DILI, 09 maiu 2022 (TATOLI)-Governu liuhosi reuniaun Konsellu Ministru (KM) estraordinária, segunda ne’e, aprova Proposta Projetu Lei Grande Opsaun Planu, ne’ebé aprezenta hosi Ministru Finansa, Rui Augusto Gomes, hanesan opsaun prinsipál ba planu tinan 2023.

Ministru Prezidénsia Konsellu Ministru, Fidelis Manuel Leite Magalhães, hateten, inisiativa ne’e hanesan ezijénsia ida hosi lei númeru 2/2022, loron 10 fevereiru, kona-ba Lei Enkuadramentu hosi Orsamentu Jerál Estadu (OJE) no Jestaun Finanseira Públika.

“Lei ida-ne’e ho objetivu atu aprova opsaun anuál no plurianuál sira, kona-ba planeamentu ho impaktu iha Orsamentu Jerál Estadu no programasaun orsamentál plurianuál, ne’ebé sei permite konkretiza orsamentasaun tuir programa sira tomak,” Ministru relata hafoin reuniaun ezekutivu, iha Palásiu Governu.

Notísia relevante: MF realiza workshop kona-ba Lei Grande Opsaun Planu

Opsaun prinsipál hosi planu tinan 2023 ne’ebé aprezenta, tuir artigu 47 hosi lei númeru 2/2022, loron 10 fevereiru, identifikasaun estratejia orsamentál no opsaun prinsipál kona-ba planeamentu, ho impaktu iha OJE ba tinan orsamentál tuirmai no ba tinan haat tutuir malu, programasaun orsamentál plurianuál inklui analiza ba projesaun sira hosi indikadór prinsipál makroekonómiku, ho influénsia iha OJE no ninia evolusaun.

Área estratéjiku 16

Proposta Projeitu Lei ne’e inklui medida prinsipál iha área estratéjiku 16, ne’ebé Governu sei foku iha tinan 2023, hanesan Agrikultura, pekuária, peska no floresta, Ekonomia no empregu, Turizmu, Dezenvolvimentu rurál no Abitasaun, Ambiente, Petróleu no minerál, Eletrisidade no enerjia renovável, Konektividade nasionál, Bee no saneamentu, Edukasaun no formasaun, Saúde, Inkluzaun no protesaun sosiál, Kultura no  patrimóniu, Reforma Estadu, Defeza no seguransa nasionál, Relasaun internasionál no Polítika externa.

Alokasaun orsamentu hodi finansia medida prinsipál iha área estratéjiku hirak ne’e sei kontempla iha Proposta OJE 2023, ne’ebé ninia objetivu prinsipál atu konkretiza Planu Estratéjiku Dezenvolvimentu Nasionál (PEDN), Programa VIII Governu Konstitusionál, inklui planu médiu prazu no planu anuál hosi servisu no entidades setór públiku administrativu.

Lei foun, Enkuadramentu Orsamentál ejize mudansa iha prosesu elaborasaun OJE ne’ebé agora prevee ezisténsia Lei Grande Opsaun Planu, ho objetivu atu Parlamentu Nasionál (PN) aprova opsaun anuál no plurianuál ein termu planeamentu ne’ebé sei fó impaktu ba OJE no programasaun orsamentu plurianuál. 

Ho inisiativa ne’e iha reforsu substansiál ba iha podér PN relasiona ho prosesu orsamentál ne’ebé envolve reprezentante povu sira desde inísiu prosesu elaborasaun orsamentu.

Ho aprovasaun ne’e, ba oin, Governu sei submete lejizlasaun ne’e ba PN atu diskute no aprova iha fulan ne’e nia laran.

Antes ne’e, Ministériu Finansa (MF) organiza ona Jornada Planeamentu iha ne’ebé membru Governu, Prezidente Autoridade, Administradór munisípiu, Responsável instituisaun Estadu no Órgaun Servisu Fundu Autónoma, Diretór Jerál inklui tékniku sira iha área finansa públika halo ona apresiasaun ba medida prinsipál iha Grande Opsaun Planu ba 2023. 

Notísia relevante: Governu realiza jornada planeamentu hodi identifika medida prinsipál OJE 2023

Servisu preparasaun iha nível tékniku ba Grande Opsaun Planu ba 2023 la’o intensivu durante semana neen, ne’ebé envolve rekollamentu medida setoriál no konsultasaun téknika ho entidade Estadu hamutuk 98 ne’ebé hola parte iha perímetru orsamentál.

Aleinde ne’e, MF halo ona analize ba medidas hosi entidade 98 atu asegura katak medida hirak ne’e aliña ona ho PEDN, Programa Governu, Planu Estratéjiku Setorál, no Planu Rekuperasaun Ekonómiku inklui mós halo aliñamentu ba Rezultadus Nasionál, ne’ebé Ajénsia Nasionál Planeamentu, Monitorizasaun no Avaliasaun (ANAPMA) dezenvolve hela.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here