Logotipu USAID. Imajen/Espesiál

DILI, 09 maiu 2022 (TATOLI) – Estadu unidu Amérika (EUA) liuhusi Ajénsia Estadu unidu ba dezenvolvimentu internasionál (USAID, sigle Inglés) anunsia doasaun US$500.000 ba Fundu Nasaun Unida ba Labarik (UNICEF, sigla inglés) hodi habelar asaun konjunta ba apoiu atu hatan ba COVID-19 iha Timor-Leste, inklui distribuisaun vasina sira.

Enkaregadu Negosius EUA, Tom Daley anunsia doasaun refere hamutuk ho Reprezentante UNICEF iha Timor-Leste, Bilal Durrani, iha kuarta semana kotuk (04/05), tuir informasaun TATOLI asesu ohin.

Verba ho kuantia US$500.000 adisionál husi Estadu Unidu nia apoiu ba UNICEF hodi habelar intervensaun sira atu hatan ba COVID-19, ajuda implementasaun kampaña vasinasaun hasoru COVID-19 no kontinuasaun servisu esensiál sira hanesan saúde maternál, neonatal no infantil.

Fundu ne’e sei mellora asesu ba fisilidade Bee-moos, saneamentu, no ijiene (BESI) iha Sentru saúde komunitária 14 sira (CHC, sigla Inglés); advokasia no konsiensializasaun simu vasina no prevensaun COVID-19; no akizisaun suprimentu médiku esensiál sira hodi ajuda ba kontinuasaun servisu saúde krítiku sira. Maizumenus populasaun 500.000 mak sei benefísia husi intervensaun sira ne’e.

“Hahú inísiu husi pandemia, Estadu Unidu serbisu hamutuk ho Governu Timor-Leste hodi fornese vasina Pfizer doze 200.000 liu no asisténsia krítiku atu kombate COVID-19 ho dolar millaun US$6.4 liu,” Enkaregadu Daley hateten.

Enkaregadu Negósiu Embaixada EUA iha Timor-Leste, Tom Daley. Imajen TATOLI/Francisco Sony

“Ami orgullu ba parseria ho Ministeriu saúde ho UNICEF hodi apoia Timor-Leste hatan ba COVID-19 no reforsa seguransa saúde atu prevene pandemia sira iha futuru. Timor-Leste bele kontinua konta ho Estadu Unidus uainhira ita serbisu hamutuk hodi hakotu pandemia no halais rekuperasaun ekonomia,” nia akresenta.

To’o iha momentu ne’e, ema rihun atus balun iha munisípiu lima benefísia ona husi atividade sira hatan ba COVID-19 liuhusi parseria entre USAID, UNICEF, no Ministériu saúde.

Ne’e realiza ona liuhusi melloria fasilidade BESI iha Sentru saúde komunitária 20 iha munisipiu lima; konsientizasaun kona-ba prevensaun COVID-19 no adosaun vasina liuhusi enkontru advokasia sira, implementasaun koordenasaun mobilizasaun pesoál no mobilizasaun husi uma ba uma iha munisipiu haat; no provizaun instrumentu fase-liman no soprimentu ijiene sira iha sentru saúde 15.

Nune’e mós, UNICEF inisia ona progresu melloramentu BESI iha Sentru saúde adisionál 14 no inísia ona akizisaun konsentradór oxijéniu médiku sira, ekipamentu protesaun pesoál, no soprimentu medikál sira seluk ba Sentru saúde komunitária sira.

“Ita agradese ba apoiu finansiamentu hodi hatan ba COVID-19 nasionál, tanba sei ajuda liu labarik no família sira hetan apoiu krítiku sira nesesita, inklui asesu ba fasilidade bee-moos, saneamentu no ijiene iha sentru saúde sira, hetan ona vasina hasoru CODID-19 no simu tratamentu uainhira sira moras,” Ministra Saúde, Odete Maria Freitas Belo, dehan.

Governante ne’e mós hatutan katak katak apoiu konjunta husi USAID no UNICEF sei ajuda mós hodi proteje profesionál saúde sira iha medida prestasaun servisu saúde sira-nian.

UNICEF apoia hela ona Timor-Leste nia hatan ba COVID-19 nasionál hahú inísiu 2020, no kontribui ona ba melloria asesu ba servisu saúde sira, inklui servisu esensiál ba nutrisaun, imunizasaun rutina no kuidadu saúde ba inan no oan sira, melloria asesu ba aprendizajen distánsia no eskola seguru sira, ajuda instala sistema sira no habelar intervensaun protesaun labarik no protesaun sosiál sira.

“Parseria entre USAID, UNICEF, no Ministériu saúde rezulta ona ba ema nia asesu ba bee-moos iha sentru saúde barak, informasaun kona-ba prevensaun COVID-19 no vasina sira no iha tempu-badak sentru saúde sira hetan soprimentu adisionál hanesan EPPs,” Reprezentante UNICEF iha Timor-Leste, Bilal Durrani afirma.

Nia akresenta katak finansiamentu ne’e sei ajuda habelar benefísiu intervensaun krítiku sira ba ema rihun-atus iha Timor-Leste tanba servisu hamutuk hodi prevene surtu COVID-19 no moras sira seluk, no ajuda formula rekuperasaun pos-COVID-19 sentrada ba labarik sira.

Notísia relevante:MS-USAID lansa atividade sustentabilidade sistema saúde iha TL

Journalista: Filomeno Martins

Editór: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here