Prezidente INSS, Longuinhos Armando Leite. Imajen TATOLI/Egas Cristóvão

DILI, 09 maiu 2022 (TATOLI)–Prezidente Konsellu Administrasaun Institutu Seguransa Sosiál (INSS), Longuinhos Armado Leite, hateten ema ne’ebé mak la servisu maibé bainhira rejistu ona INSS sei kontribui 10%.

Notísia Relevante: 2022, INSS sei tau importánsia ba programa prioridade tolu

“Ema ne’ebé mak la servisu kontribui 10% kada fulan bainhira rejistu ona iha INSS, tanba nia la hanesan ho traballadór ka funsionáriu sira,” Prezidente INSS hateten ba Agência TATOLI, via telefónika, segunda ne’e.

Tanba tuir Dekretu-lei númeru 47 hateten katak kontribui ba seguransa sosiál ne’e hamutuk 10%, ne’ebé kompostu hosi 4% maihosi traballadór no 6% maihosi empregadór, nune’e bainhira kada fulan simu saláriu, seguransa sosiál sei ko’a osan 4% hosi traballadór no 6% kontribui hosi empregadór.

Prosesu kontribuisaun ne’e hanesan maibé diferensa mak servisu ho nia rendimentu inklui kontribuisaun 10%, tanba funsionáriu nian ne’e 4% hosi funsionáriu ka traballadór rasik no 6% mai hosi instituisaun ne’ebé mak nia servisu ba, maibé kontrariu ho ema ne’ebé mak la servisu tanba nia tenke kontribui 10%.

“Ita dehan nune’e, tanba nia hanesan na’in no traballadór ba nia atividade negósiu rasik,” nia dehan.

Antes ne’e, Tékniku Jurídiku INSS, hateten, bainhira ema ida mak kontribui ona ba seguransa sosiál mak aban bainrua nia sei hetan pensaun haat (4) no subsídiu neen (6) liuhosi sistema kontribuisaun fakultativa Seguransa Sosiál nian.

Pensaun haat (4) ne’e mak hanesan pensaun reforma, pensaun invalidéz iha rua mak relativa ho absoluta no pensaun sobrevivensia, no subsídiu ne’e iha neen (6) mak subsídiu mate, maternidade, risku klíniku, abortu, paternidade no adosaun.

“Prosesu ne’ebé mak ita aplika ba sistema kontribuisaun fakultiva mak ita ba foti formuláriu formatu iha seguransa sosiál prenxe no anexa ho kartaun eleitorál no sertidaun RDTL depois ita eskolla tabela ne’ebé mak lei define tiha ona,” nia hateten.

Iha tabela ne’e, nia dehan, iha eskandalu 10 ne’ebé kiikliu mak $6 ne’ebé hanesan ho fulan ida $60 no boot liu mak $30 fulan ida $300.

“Maibé konta ona ho 10%, mak 4% maihosi traballadór no 6% ne’e nafatin hosi nia rasik tanba nia la servisu iha instituisaun ruma mak nia tenke responsabiliza hotu. Tanba, bainhira ema ida kontribui ona ba seguransa sosiál mak nia sei hetan pensaun hanesan funsionáriu públiku sira seluk,” nia dehan.

Tuir nia, dadus ne’ebé mak iha INSS katak ema ne’ebé mak rejistu iha sistema ba kontribuisaun fakultativa besik ema na’in-704, maske gráfika dadus sistema fakultativa iha INSS sei tun-sae.

Nune’e, prezidente INSS apela ba traballadór sira ka ema ne’ebé mak halo negósiu bainhira simu ona subsídiu hosi Governu ne’e, aumezmu tempu tenke adere ona ba seguransa sosiál, nune’e aban bainrua hetan mós benefísiu bainhira hetan dezastre ruma.

“Maibé traballadór barak la hanoin ida-ne’e, hanesan foin lalais sira simu tiha subsídiu sira lakohi kontribui ona 10% ba seguransa sosiál, ida-ne’e sai problema boot ida ba sira iha futuru,” nia dehan.

Tanba, empreza mak sei ba rejistu ninia traballadór iha INSS maibé aban bainrua direitu ne’e empreza mak hetan tanba fulan-fulan empreza selu traballadór 6% ona, konserteza empreza mak simu direitu ne’e.

Longuinhos Armando kantinua alerta ba traballadór hotu-hotu iha Timor-Leste ne’ebé hala’o atividade tenke kria konta bankária no mós rejistu iha Institutu Nasionál Seguransa Sosiál (INSS).

Nia husu ba traballadór sira liu-liu ba motorist transporte públiku sira labele aproveita situasaun hodi hetan subsídiu maibé tenke mai rejistu maibé iha situasaun normál mós bele rejistu hodi bele involve-an iha Seguransa Sosiál (SS) atu asegura futuru.

“Ita hanoin sira-nia futuru tanba sira mós traballadór ida bainhira hetan dezastre ruma oinsá mak sira bele hetan subsídiu hosi Governu. Tanba ne’e, labele hanoin subsídiu fulan ida rua nian. Maibé bainhira situasaun normál tenke rejistu iha seguransa sosiál nune’e bele proteje no asegura imi iha futuru,” nia apela.

Kritériu ba motorista sira atu rejistu mak traballadór tenke lori Karta Kondusaun (SIM) motorista, STNK, Kartaun Eleitorál no seluk tan no ba ema ne’ebé mak faan lori kartaun eleitorál depois sei prenxe formuláriu ne’ebé mak funsionáiru INSS prepara ona.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here