Jornalista hosi Agência TATOLI, Hortencio Sanchez intervista hela Embaixadora Timor-Leste iha Vietname, Olandina Isabel Caeiro Alves iha edefisiu Embaixada Timor-Leste iha Vietaname, loron segunda (09/05). Imajen/Eggy Mbape

VIETNAME, 09 maiu 2022 (TATOLI)— Embaixadora Timor-Leste iha Vietname, Maria Olandina Isabel Caeiro Alves, hateten nia-parte halo enkontru dala-barak ho líder sira iha nasaun Vietname ne’ebé louva no kongratula Povu Timor-Leste tanba eleisaun Prezidensiál ne’ebé la’o iha primeira volta no segunda volta ho susesu no tuir prosesu demokrátizasaun.

“Sira kongratula ita nia eleisaun ne’ebé foin lalais liu ho susesu tebes no líder sira dehan ida ne’e ezemplu di’ak ida ba nasaun hotu iha ASEAN, nune’e sira nia politika kona-ba ita di’ak tebes,” Embaixadora ne’e hateten ba Agência TATOLI iha Vietname, segunda ne’e.

Ho situasaun hirak ne’e, Diplomata timoroan ne’e dehan Prezidente Vietname, Nguyen Xuan Phuc, rasik hatoo ona pedidu ida bainhira Embaixadora ne’e entrega karta kredensiál atu Timor-Leste ho Vietname halo kooperasaun ida hodi simu nia investidór sira halo investimentu iha Timor-Leste.

“Hanoin ida ne’e sinal di’ak ida, ita hein katak hosi tinan ida ne’e ba oin ita bele iha investidór ba vizita ita nia rain hodi halo investimentu, nune’e bele apoia ita. Tanba sira rasik mós kontente rona ita nia situasaun iha rai laran la’o di’ak,” Diplomata ne’e afirma.

Vietname kontente apoia Timor-Leste liuhosi akordu ne’ebé selebra ona iha 2015 too agora la’o hela mak Governu sosa foos hosi nasaun refere.

“Ita mós hakarak halo akordu ho sira iha setór agrikultura tanba sira nia agrikultura iha ne’e la’o kapas tebes bele sai ezemplu ba ita hanesan sira nia haré bele produs tinan ida ne’e kolleta dala haat,” Diplomata ne’e akresenta.

Nune’e, Embaixadora ne’e kontinua polítika interese Estadu Timor-Leste hodi hodi importansia mak atu halo kooperasaun iha área agrikultura no turizmu.

“Sira nia turizmu iha ne’e evoluidu tebes  hodi hatama reseita ba sira nia nasaun makas tebes ida ne’e mak ita bele haree tuir, ha’u sente ita Timor -Leste bele haree tuir mak programa ida home state turista ba ita nia rain la presiza ba hela iha Hotel boboot tanba iha ema nia rain hela iha Hotel boot, entaun sira ba ita nia rain hakarak ba iha fatin sira ne’ebé besik liuba komunidade,” nia afirma.

Daudaun ne’e Timor-Leste servisu hamutuk hela ho kompañia Vietname nian área  telekomunikasaun hanesan emprezaTelemor ne’ebé ajuda ona iha dezenvolvimentu área telekomunikasaun durante tinan 10-resin ona.

Notísia relevante: Vietname laiha objesaun adezaun Timor-Leste ba ASEAN

Jornalista: Hortencio Sanchez

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here