Administradór postu administrativu Bobonaro, Juvinal Leto-Mau dos Santos. Imajen Tatoli/Sérgio da Cruz.

BOBONARO, 09 maiu 2022 (TATOLI) – Postu administrativu Bobonaro, munisípiu Bobonaro, sei komemora loron proklamasaun independénsia 20 maiu ho atividade desportu.

Administradór postu administrativu Bobonaro, Juvinal Leto-Mau dos Santos, informa, loloos ne’e tinan ne’e sei realiza atividade desportu sira seluk, maibé tanba limitasaun orsamentu mak komisaun organizadora foka de’it ba modalidade futeból no sei hili klube rua iha suku vila de’it mak partisipa hodi harame komunidade sira-ne’ebé partisipa komemorasaun loron importante ne’e.

Atvidade desportu ne’e sei realiza iha loron 19 fulan-marsu iha kampu futeból postu administrativu Bobonaro no loron 20  maiu sei hasa’e bandeira nasionál iha nivél postu ne’ebé administrador ne’e rasik mak sei sai inspetór serimónia.

“Ha’u hili suku Malilait ho suku Bobonaro mak joga, atividade ne’e ita realiza la’ós joga atu manán prémiu ka osan ruma, maibé atu anima de’it komunidade sira iha loron 19 maiu lokraik, lori Bandeira hosi suku-suku mai konsentra hotu iha postu, entaun aproveita ho jogu ne’e ita bele harame netik,” nia informa Tatoli, iha salaun administrasaun munisípiu Bobonaro, segunda ne’e.

Nia apela ba komunidade suku 18 ne’ebé eziste iha postu administratrivu Bobonaro, atu partisipa másimu iha komemorasaun tinan ne’e hodi fó onra ba eroi sira-ne’ebé durante tempu naruk sakrifika sira-nia aan no mate ba rai ne’e to’o hetan independénsia.

Maibé nia dehan, komunidade sira mai partisipa labele haree de’it ba osan ne’ebé governu aloka, maibé hanesan sidadaun ida-ne’ebé di’ak enke kuda  sentidu nasionlizmu no patriotizmu iha fuan no iha vontade rasik partisipa.

Molok ne’e iha enkontru ne’ebé realiza iha  loron 27 abril ne’e, autoridade munisípiu Bobonaro preve rihun $10. Hosi montante ne’e aloka ba postu administrativu Bobonaro hamutuk $1,500 hodi montante ne’e sei distribui ba kada suku $75 dolar no restante gasta ba serimónia hasa’e Bandeira nasionál.

Tuir dadus hosi diresaun estatístika munisípiu Bobonaro iha loro 01 fulan-jullu to’o 31 dezembru 2018, postu administratrivu Bobonaro iha suku 18 ho totál populasaun 29,262 ho ho totál uma-kain 6.249.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here