Prezidente ANC, João Olívio Freitas no Prezidente TANE Konsumidór, António Ramos da Silva asina akordu iha salaun Ministeriu Transporte no Komunikasaun, Caicoli, segunda (10/05). Imajen/Espesiál

DILI, 09 maiu 2022 (TATOLI)Autoridade Nasionál Komunikasaun (ANC, sigla portugés) hamutuk ho Asosiasaun TANE Konsumidór, segunda ne’e, asina protokolu kooperasaun hodi haforsa liután servisu proteje direitu konsumidór sira asesu no utiliza servisu telekomunikasaun.

“Serimónia ne’e ho objetivu prinsipál atu haforsa liután servisu asegura no defende direitu konsumidór sira atu asesu no utilizasaun servisu telekomunikasaun, tanba protesaun konsumidór nian hakerek ona iha Dekretu-Lei 15/2012 iha artigu 48 to’o 52,” Prezidente ANC, João Olívio Freitas, hateten, iha salaun Ministeriu Transporte no Komunikasaun, Caicoli.

Dekretu lei 15/2012 iha artigu 48 to’o 52 ko’alia kona-ba responsabilidade no dever operadór sira bainhira fornese servisu telekomunikasaun ba públiku no iha tempu hanesan direitu konsumidór ida bele hetan direitu bainhira adere ba servisu telekomunikasaun ne’e rasik.

Notísia relevante: ANC fó sansaun koima $70.000 ba operadór telekomunikasaun

Nune’e, esforsu ne’ebé ANC halo nu’udar órgaun reguladora mak eduka povu bele hatene liután direitu sira, liuliu adere ona ba servisu telekomunikasaun sira liuhosi formasaun no edukasaun.

“Servisu ida-ne’e sei sai boot no kama’an bainhira ita envolve instituisaun relevante sira ne’ebé iha misaun hanesan. Entaun kooperasaun ne’ebé entidade rua ne’e halo atu serbisu hamutuk implementa programa sosializasaun ida, nune’e bele eduka di’ak liután povu atu sira bele hatene sira-nia direitu, prosedimentu no dalan ne’ebé sira la’o tuir bainhira sira hakarak halo reklamasaun ruma hasoru difikuldade,” nia akresenta.

Iha fatin hanesan, Prezidente TANE Konsumidór, António Ramos da Silva, konsidera inisiativa ne’e atu materializa servisu TANE Konsumidór ne’ebé durante ne’e dezenvolve, nu’udar reprezentante konsumidór sir  iha área hotu, maibé ba konteksu ne’e espesífiku liu iha área telekomunikasaun.

“TANE Konsumidór kolabora ho ANC iha área sosializasaun direitu no dever konsumidór sira liuhosi edukasaun ba konsumidór, ne’ebé protokolu ne’e mai atu materializa de’it atividade ne’ebé parte rua dezenvolve ona, nu’udar prinsípiu ida katak konsumidór sira iha direitu asesu ba informasaun no direitu atu hetan informasaun loloos tanba dala-ruma akontese iha violasaun direitu konsumidór sira hosi operadór,” nia dehan.

Nune’e, nia husu ba konsumidór sira bainhira operadór telekomunikasaun halo violasaun direitu, konsumidór sira bele halo keixa.

“Maneira ne’ebé ami uza atu rezolve mak bainhira ami hetan informasaun ruma hosi konsumidór sira katak hetan violasaun direitu hanesan enxe pulsa seidauk uza maibé pulsa hotu derrepente, ami sei komunika ho parte operadór sira atu rezolve no bainhira laiha solusaun mak ami sei halo mediasaun maibé nafatin laiha rezultadu mak entrega ba ANC tanba sira mak haree ba operadór telekomunikasaun sira,” Prezidente TANE Konsumidór informa.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here