Kombinasaun dansa kultura uza bandeira RDTL, iha ambitu promove marka turizmu liuhosi Pintura. Imajen Tatoli/Francisco Sony.

BOBONARO, 08 maiu 2022 (TATOLI)—Xefe Suku Oe-Leu, postu administrativu Bobonaro, munisípiu Bobonaro, Januario Braganca, orienta komunidade hasa’e Bandeira Repúblika Demokratika Timor-leste (RDTL) iha uma oin hodi komemora loron restaurasaun independénsia Timor-Leste ba dala-XX.

Lider komuntária ne’e hateten, Primeiru-Ministru, Taur Matan Ruak mós hato’o ona mensajen ba povu tomak iha territoriu nasionál atu ida-idak dada sae Bandeira, no reforsa hosi reuniaun nivél administrador postu administrativu Bobobnaro hatun ona despaixu ba xefe suku sira atu aviza ba komunidade sira hasa’e bandeira iha uma oin.

“Tamba ne’e mak ohin ha’u ho ha’u-nia xefe aldeia na’in rua, komesa aviza ona tama sai bairru-bairru hahú agora hotu-hotu tenke hasa’e ona Bandeira RDTL iha uma oin, atu komemora ita-nia loron importante ne’e,” Xefe Suku ne’e informa ba Agência Tatoli iha Oe-Leu, domingu ne’e.

Husu ba komunidade tenke respeita loron 20 maiu hanesan loron importante, tanba iha tinan 20 ba kotuk mak mundu rekoñese Timor-Leste nia independénsia hodi harii pais Repúblika Demokrártika Timor-leste (RDTL) hamrik hanesan nasaun Independente ho nia soberania rasik.

“Nu’udar sidadaun iha dever no obrigasaun hasa’e Bandeira iha uma oin, tanba loron ne’e importante tebes ba Timor-Leste nia éroi sira luta ba ukun rasik-an ida ne’e. Mate rihun ba rihun ninia sofrementu ne’ebé mak ohin loron ita goza ona. Tanba ne’e, importante loos ita hasa’e Bandeira hodi valoriza éroi sira-nia sakrifísiu,” nia dehan.

Nia promote sei mobiliza komunidade no lia-na’in sira hotu lori Bandeira suku nian atu partisipa iha serimónia isar Bandeira Nasionál ne’ebé Governu sei realiza mós iha nivél postu administartivu.

Purtantu, suku Oe-leu, iha aldeia rua kompostu hosi aldeia Mologen no Oe-leu Taz ho nia totál populasaun 1,980  hamutuk uma-kain 379.

Entertantu atu komemora loron restaurasaun independénsia tinan ne’e, autoridade munisípiu Bobonaro aloka orsamentu hamutuk rihun $10 no hosi montante ne’e sei aloka ba postu administartivu sira hamutuk $1.500 no hosi suku 50 iha munisípiu Covalima ne’e kada suku sei hetan $75.

Jornalista : Sérgio da Cruz

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here