Edifísiu UNPAZ iha Ai-mutin. Imajen Tatoli/Egas Cristovão.

DILI, 08 maiu 2022 (TATOLI)–Universidade da Paz (UNPAZ) seidauk asesu liña kréditu ba ‘Ensinu Superiór Kualidade Plus’ tanba tanba MESSK no BNCTL to’o agora seidauk responde proposta kréditu ne’ebé sira aprezenta, maibé instituisaun rua ne’e dun malu sé mak atu prosesa proposta refere.

Notísia Relevante: MESSK no BNCTL asina akordu liña kréditu ‘Ensinu Superiór Kualidade+’

Reitór UNPAZ, Adolmando Soares Amaral. Imajen TATOLI/Egas Cristovão.

“Ami fó ona koñesimentu ba ministériu no haruka ona proposta ba BNCTL maibé banku dehan proposta kréditu labele dirije ba sira tenke haruka ba MESSK depois mak fó koñesimentu ba sira (banku). Ami foti fali proposta hosi banku ba hadi’a depois dirije fali ba MESSK maibé ministériu liu hosi asesór bolu fali ami hodi hateten MESSK la simu proposta, maibé simu de’it mak koñesimentu,” Reitór UNPAZ Adolmando Soares Amaral informa ba Agência Tatoli iha kampus UNPAZ, domingu ne’e.

Polítika VIII Governu Konstitusionál nian ne’e kapaas tebes tanba iha interrese atu apoiu hodi hasa’e kualidade Instituisaun Ensinu Superiór privadu sira-nian liuhosi programa liña kréditu ne’e, maibé implementasaun ne’e mak la klaru tanba ministériu ho banku dudu malu hela hodi la barani foti risku.

“Ami hanesan bola ne’ebé sira dun ba-mai hela. Aami ba banku sira haruka mai ministériu. Ami mai ministériu sira haruka ba banku, ne’ebé agora ami la hatene atu halo saida,” nia dehan.

Rekizitu kona-ba kréditu nian, UNPAZ prenxe hotu ona maibé sé loos mak atu foti desizaun ne’e mak seidauk hatene, maibé proposta kréditu ne’e nia parte hatama kuaze fulan tolu ona.

Univesdidade ida bele asesu liña kréditu hafoin Governu ho BNCTL asina ona akordu no kada universidade másimu bele kréditu to’o $500.000 ho ninia jurus depende ba banku, maibé obrigasaun Governu sei responsabiliza 3% hosi kréditu ne’ebé universidade sira foti.

“Tuir kontratu kréditu ne’ebé mak Universidade realiza ho MESSK, sira fó to’o de’it $500,000 labele liu ida-ne’e no kréditu ne’e mós Universidade foti atu halo investimentu la’ós atu selu fali saláriu,” nia dehan.

Ministériu Ensinu Superiór Siénsia no Kultura (MESSK), iha janeiru nia klaran, kuarta (26/01), asina akordu ho Banku Nasionál Komérsiu Timor-Leste (BNCTL, sigla portugés) atu hahú fó kréditu ba Universidade akreditadu hamutuk 16 hodi hadi’a kualidade infraestrutura no kapasitasaun rekursu umanu.

MESSK simu ona lista ka dadus hosi universidade 16 ne’ebé mak iha posibilidade atu asesu kréditu ba tinan ida-ne’e, maibé proposta ne’ebé konfirmadu ona mak Institute off Business (IOB), Institutu Dom Boa Ventura, Universidade de Dili (UNDIL), UNITAL, UNPAZ no ETCI hodi hadi’a infraestrutura no kapasita rekursu umanu universidade nian. 

Notísia Relevante: MESSK prevee millaun $2,5 ba liña kréditu Ensinu Superiór Kualidade+

Jornalista : Tomé Amado

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here