COVALIMA 7 Maiu 2022 (TATOLI)– Komunidade aldeia Loo, suku Suai Loro, postu Suai, Munisípiu Cowalima hakarak komemora loron restaurasaun independénsia Timor-Leste dala-20 liuhosi promove komptetisaun desportu tradisonál ka kuda halai taru.
Xefe suku Suai Loro, Martinho Mendonça, hateten nia-parte mobiliza joven-sira hodi halo lutu haleu kampu kuda halai taru atu prepara-an ba komemora loron independénsia Timor-Leste.
“Ami mobiliza joven-sira halo lutu hodi haleu kampu atu prepara ba atividade halai kuda taru iha ámbitu komemorasaun loron independénsia Timor-Leste (20 maiu 2002-20 maiu 2022) ba dala XX,” Xefe suku ne’e hateten ba Agência TATOLI, iha kampu kuda halai taru iha Suai Loro, sábadu ne’e.
Nia dehan joven sira ho inisiativa foti ai hodi halo lutu haleu kampu atu prepera eventu komunitariu hodi festa loron importante ne’e.
Tuir oráriu iha loron 19 maiu, kuda hamutuk 30 mak sei partisipa kompetisaun ne’e hodi komemora loron independénsia ba dala XX.
Entretantu, Prezidente Komisaun Organizadóra 20 Maiu, Francisco de Jesus Alves, hateten, atu komemora loron independénsia, munisípiu Covalima sei realiza atividade despotu komunitáriu no bazar kalan, maibé ho mós atividade sira seluk tan.
Enkuantu, Xefe Suku Debos Agustino da Silva mós husu komunidade atu dada-sa’e bandeira RDTL iha kada uma oin iha ámbitu atu komemora loron independénsia 20 maiu ba dala-XX.
Notísia relevante: Covalima tenke kontinua promove kultura kuda halai taru
Jornalista: Celestina Teles
Editor : Florencio Miranda Ximenes
