Ekipa Selesaun Nasionál Timor-Leste U-23. imajen/Hortencio Sanchez

VIETNAME, 07 maiu 2022 (TATOLI)— Treinadór Prinsipál ekipa Selesaun Nasionál Timor– Leste U-23, Fabio Maciel da Silva, hateten ekipa selesaun nasionál U-23 hasoru situasaun defisil iha jogu SEA Games tanba maioria jogadór importante pozitivu COVID-19 no daudaun sei iha izolamentu Malázia.

“Situasaun komplikadu tanba ita agora iha de’it jogadór na’in-15 de’it, laiha treinadór guarda rede no laiha asistente treinadór tanba sira pozitivu hela COVID-19, nune’e difisil nafatin mai ita iha jogu aban kontra Myanmar. Maibé ita iha nafatin espiritu esportivu hodi kompete,” Treinadór ne’e hateten ba Agência TATOLI iha Vietname, sábadu ne’e.

Tuir oráriu, aban (08/05) ekipa Timor-Leste hasoru Myanmar nuudar jogu daruak iha SEA Games.

“Ita nian (jogadór) deskansa loron ida de’it, maibé bele rekupera ka lae? tanba aban hasoru kedan Myanmar ona, depois ita deskansa loron ida de’it kontra kedan Indonézia entaun difisil loos maibé ho espiritu sportivu no luta hanesan ha’u koalia ona ba jogadór sira ita la interese saida mak akontese, tenke luta nafatin ho fiar an manán maibé tenke hatudu jogu ho di’ak,” nia akresenta.

Fallansu TL kontra Filipina

Jogu dahuluk iha SEA Games entre Filipina ho Timor-Leste ho rezultadu eskore 4-0. Imajen/espesial

“Ita lakon ho Filipina tanba situasaun komplikadu mak halo jogu ladun di’ak, nunka hatudu jogu sai loloos tuir saida mak ita hakarak. Ita hotu hatene ekipa ne’e kuandu joga iha AFC Singapura joga iha AFF Kamboja hatudu jogu ne’ebé di’ak tebes kompara ho jogu horsehik ne’e ladun di’ak tanba problema sira ekipa hasoru liuliu agora guarda rede na’in-ida de’it tanba  na’in-rua pozitivu, jogadór seluk ho treinadór na’in-rua pozitivu hotu Covid-19 ne’e halo ita falla kedan,” nia afirma.

Daudaun ne’e jogadór na’in-lima mak pozitivu sei hela iha Malázia seidauk bele tama mai Vietname no João Bosco Hale hamutuk ho treinadór guarda rede,Julião Monteiro tama ona iha Vietname mak pozitivu COVID-19

Tanba ne’e, Treinadór ne’e husu atu públiku hotu bele komprinde ba situasaun ne’ebé ekipa selesaun nasionál U-23 hasoru hela iha Vietname.

“Ha’u la husu deskulpa tanba hotu-hotu hatene situasaun saida mak akontese. Iha jogu ne’e buat hotu mak ha’u halo, iha primeira parte ita termina ho 0-1, maibé iha segunda parte ha’u tenta atu halo empata jogu ne’e. Maibé estratéjia hotu ita halo labele sai tuir saida mak ita hakarak,” nia esplika.

Tuir nia, bainhira situasaun la akontese hanesan ne’e ekipa Timor-Leste sei hatudu jogu ne’ebé di’ak hanesan jogu amigavél ne’ebé hala’o ho ekipa Malázia ne’ebé konsege manán 2-1.

Ho nune’e, nia dehan hanesan treinadór sei esforsu makas iha jogu tolu tuir mai liuliu kontra Myanmar, Indonézia no uma-na’in Vietname labele hanesan tan kontra Filipina.

Notísia relevante: Jogadór na’in-neen pozitivu COVID-19, TL derrota kontra Filipina 0-4

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here