Apolónia de Araujo Babo sai vensedora ba prémiu VIII lingua portuguesa tinan 2022 hosi Fundasaun Oriente.Imajen/espesial

DILI, 07 maiu 2022 (TATOLI)— Apolónia de Araujo Babo sai vensedora ba prémiu VIII lingua portuguesa tinan 2022 hosi Fundasaun Oriente tanba aprezenta testu konkursu ho titulu “O Rapazinho Sonhador”.

Ba vesesdór daruak okupa hosi Hornai da Silva Ramos ne’ebé aprezenta ninia testu konkursu ho titulu “Magnifiku Likurai Alamau”.

Manán na’in datoluk mak Octávio Marques de Carvalho   ho titulu konkursu “O ladrão do céu”.

Joven na’in tolu ne’e hosi Departamentu Língua Portuguesa iha Fakuldade Edukasaun, Arte no Umanidade (FEAH,sigla Portugés), Universidade Nasionál Timor Lorosa’e (UNTL).

Violanto Ribeiro hanesan mós estudante língua Portuguesa no Direitu iha UNTL mak manán na’in dahaat ho testu “Um menino do grupo de pés descalços”. Manán na’in dalimak mak Maria Goreti da Silva Horta hanesan mós estudante Língua Portuguesa iha UNTL ho testu “A ribeira Na’I Lok.”. Leónia Gusmão Fernandes hanesan lisensiada Portugués hosi Universidade Estadual   Paraíba Brazil ne’ebé hetan mánan na’in-daneen ho testu “As primeiras rainhas da Aldeia”.

Vensedora Apolónia de Araújo Babo, hateten nia parte sente kontente no orgullu hodi hakerek iha lian portugés tanba língu ne’e la’ós lian materna.

“Hau nia motivasaun tuir konkursu ida ne’e atu aprende portugés  tanba língua portugés  hanesan mós pertense  ba vida timór-oan,” nia agradese.

Joven ho idade 25 hosi munisípiu Ermera ne’e ho nia-testu ida ne’e ko’alia kona-ba realidade moris timór nian liuliu ba labarik sira.

“Ha’u nia testu ne’e realidade ne’ebé akontese iha Timor exemplu moris labarik sira nian hanesan abandona husi inan-aman liuliu divórsiu, labarik sira minoridade faan sasan no falta edukasaun formal,” Nia hateten.

 Iha biaban hanesan, Delegada Fundasaun Oriente, Joana Saraiva, hateten entrega  prémeu VIII   Língua Portuguesa tinan 2022 ba vensedór sira, nune’e ba vensedora dahuluk sei kontinua kursu fulan-ida iha Portugál.

“Ami servisu hamutuk ho manán na’in sira hodi prepara nia dokumentu no billete atu viájen iha tinan ne’e hamutuk ho joven na’in-rua ne’ebé iha tinan 2020 sai mánan na’in ba prémiu ne’e,” Delegada ne’e afirma.

Vensedór joven Timór-oan ne’e sei hala’o viáje ba Portugál iha loron 22 maiu too 27 juñu atu tuir kursu iha Verão Língua Portuguesa iha Universiadade Minho, Portugál.

Prémiu Língua Portuguesa ida ne’e hanesan konkursu eskrita hosi Fundasaun Oriente ba joven timór-oan liuliu idade 18 too 28 hodi compete.

Nune’e, ba vensedór dahuluk Fundasaun Oriente fasilita bá kursu fulan-ida iha Portugál no segundu lugar hetan osan montante $500 no terseira lugar hetan $300. Enkuantu vensedór dahaat to’o dalimak sei kontinua kursu Língua Portuguesa iha Fundasaun Oriente Dili.

Jornalista: Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here