Logotipu TDD. Imajen Tatoli/Dok.

DILI, 06 maiu 2022 (TATOLI)— Tribunál Distritál Dili (TDD), sesta (06/5) ne’e, kontinua halo julgamentu ba arguidu XZL nuudar dirijente Organizasaun East Timor Blind Uniaun (ETBU) ne’ebé deskonfia komete krime abuzu konfiasa.

Iha audénsia, Lezadu JP konfesa ba tribunál katak loos duni iha tinan 2020, nia-parte troka arguidu XZL komete irregularidade no membru sira lakon ona konfiansa.

“Arguidu jere osan la tuir programa asosiasaun nian. Tanba ne’e maka momentu ne’eba, ha’u notifika arguidu sira atu entrega sasan kantor nian, maibé arguidu sira la entrega ho razaun tanba lakohi tun husi nia kargu. Tanba ne’e to’o agora arguidu sira seidauk entrega sasan sira ne’e,” Lezadu JP hateten iha sala julgamentu TDD, sesta ne’e.

Lezadu esplika ba tribunál katak nia lidera fali ETBU ne’e atividade sira la’o di’ak, maibé nia la hetan saláriu.

hafoin tribunál rona tiha lezadu JP nian deklasaun, tribunal deside hodi halo adia julgamentu ba loron 1 Juñu hodi kontinua rona  sasin sira seluk nia deklarasaun.

Molok ne’e, Ministériu Públiku aprezenta faktu  ba tribunál  katak  UDC maka nuudar Diretór iha asosiasaun ETBU nian hosi períodu 2018 too 2020 hamutuk ho arguidu ZXL ne’ebé nuudar Xefe Departamentu Finansa

 Iha loron 26 Juñu 2020, membru hosi asosiasaun ETBU fó fiar fali lezadu ho inisiál JP hodi troka arguidu ZXL ho razaun lakon  fiar hosi membru tanba ezekuta orsamentu la tuir  programa.

Iha loron ne’ebé hanesan iha tuku 11:00 arguidu foti karreta hilux ne’ebé propriataria hosi asosiasaun ETBU iha nia sede Bekora hodi lori ba tau iha nia uma no la entrega fila.

Enkuantu, arguidu ZXL foti komputadór ida ho imprime ho marka HP iha sede asosiasaun ETBU no la entrega fila-fali.

Nune’e, iha junu 2020 lezadu JP nuudar Diretór foun ba ETBU labele halo atividade ba programa tanba karreta no komputador inklui mákina imprime iha hela arguidu ZXL.

Maske, arguidu sira hatene katak sasan sira ne’e propriedade ba asosiasaun ETBU nian, maibé arguidu sira lori ba uma hanesan sira nia privadu.

Tanba ne’e, Ministériu Públiku akuza arguidu sira ho krime abuzu konfiansa agravadu ne’ebé previstu iha artigu 257 iha kódigu penál Timor-Leste.

Audénsia julgamentu ne’e prezide husi juis koletivu Argentino Luisa Nunes, Alvaro Maria Freitas, Antonio Gonsalves, Ministériu Públiku reprezenta husi prokuradór Reinato Berenahak, no arguidu  hetan asisténsia legál hosi Defensér Públiku  João Carvalho.

Notísia relevante: TDD julga arguidu na’in-rua ba kazu abuzu konfiansa iha Asosiasaun ETBU

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here