DILI, 06 maiu 2022 (TATOLI)— Xefe Sentru Saúde Formoza, Jaime do Reis, hateten presiza transporte atu reforsa programa Servisu Integradu Saúde Komunitáriu (SISCA) hodi hakbesik saúde ba komunidade sira iha postu administrativu Na’in-Feto.
“Ami preokupa tebes tanba transporte laiha atu reforsa programa SISCA liuliu saúde na família no klínika movél ba komunidade sira,” Xefe Sentru Saúde Formoza ne’e hateten ba jornalista sira iha nia knaar fatin-Formoza-Dili, sesta ne’e.
Atu implementa programa SISCA iha aldeia, suku no postu administrativu presiza transporte tanba profisionál saúde liuliu Médiku, Parteira no Enfermeiru na’in-lima mak tun ba tereñu hodi fó tratamentu saúde ba komunidade sira.
“Ita karreta laiha oinsá mak ami atu implementa programa sira ne’e tanba ne’e ami husu ba responsabilidade Saúde munisípiu Dili nian atu hatoo ba Minsitériu Saúde hodi rezolve sasan sira ne’e,” nia afirma.
Responsavél ne’e afirma antes ne’e karreta iha ho kondisaun di’ak, maibé la too tinan karreta ne’e aat no konsege hadi’a tiha, maibé Ministériu Saúde mai foti fali ho razaun atu halo leilaun.
Nia dehan iha mós difikuldade ekipamentu médiku thermometer no tensimeter la sufisiente no ekipamentu naun médiku hanesan meza, kadeira ba pasiente sira atu tuur hodi simu tratamentu.
“Ami hato’o ona preokupasaun ne’e ba Diretora Servisu Saúde Munisípiu Dili, maibé too agora laiha solusaun,” nia lamenta.
Alende ne’e,hahú fulan janeiru mai too marsu, númeru moras aas liu iha sentru saúde Formoza mak Ispa, diareia, moras kulit, hipertensuan no diabetes. Enkuantu kona-bá aimoruk sira nafatin sufisiente.
Programa SISCA estabelese iha tinan 2009 liubá no hetan apoiu maka’as hosi Voluntáriu Saúde sira iha Suku.
Polítika Ministériu saúde mak harii SISCA hanesan servisu integradu ne’e iha tinan 2009 no iha tinan 2015 harii saúde na família tanba servisu lubuk ida mak integra husi servisu sira ne’e.
Ministériu Saúde hetan apoiu orsamentu hosi doadór sira hanesan Uniaun Europeia ho UNICEF hodi suporta ba implementasaun programa SISCA no Kuidadu saúde Primária tanba ne’e persiza atu implementa ho seriedade.
Too tinan 2022, Uniaun Europeia apoiu ona millaun $15 ba Ministériu Saúde hodi implementa programa hirak ne’e, kompostu hosi millaun $5 apoiu tékniku ba MS no millaun $10 aloka liuhhosi Ministériu Finansa hodi implementa programa ministériu nian.
Jornalista : Felicidade Ximenes
Editór : Florencio Miranda Ximenes
