Sekretáriu Estadu Kooperativa, Elizário Ferreira. Imajen Tatoli/Francisco Sony

DILI, 06 maiu 2022 (TATOLI) – Sekretáriu Estadu Kooperativa (SECoop, sigla portugés), Elizário Ferreira, loke asembleia jerál dahuluk kona-ba kooperativa Kréditu Uniaun Prosperiedade (CUP, sigla portugés) iha Postu Administrativu Lospalos, Munisípiu Lautem.

“Ha’u fó parabens ba estrutura no membru fundadór sira tomak tanba ho inisiativa rasik bele realiza Asembleia Jerál ba dahuluk CUP, tanba ita boot sira harii kooperativa ne’e ho inisiativa rasik, papél Estadu ninia mak atu promove, eduka, no forma hodi asegura ninia sustentabilidade instituisionál, finanseiru, no ekonómika,  asegura mós vida ekonómiku ka prosperiedade família nian atu nune’e bele kontribui ba ekonómia sosiedade nian iha Lospalos, ba mós nasionál nian”, revela Elizário Ferreira, liuhosi nota ne’ebé Agência Tatoli, asesu, sesta ne’e.

SECoop husu ba fundadór sira mantein servisu tanba Kréditu Uniaun ne’e ninia papél ida oinsá maka bele asesu finanseiru ba ninia membru sira, jere osan membru sira nian ho di’ak, kapitaliza membru sira liuhosi impréstimu, ho “jurus” ida viável atu nune’e bele kontribui ba ekonómika membru sira nian hodi prodúz efeitu ba vida família nian.

Governante ne’e mós husu ba dirijente kooperativa sira atu realiza reuniaun beibeik hodi komunika dazafiu no progresu kooperativa ba membru no estrutura sira, nune’e kooperativa CUP bele la’o ho di’ak.

“SEKoop komprometidu sei fó apóiu reforsa institusionál hanesan, prontu fasilita, formasaun ba dirijente sira, prontu atu kompleta nesesidade eskritóriu nian, hodi fasilita membru kooperativa sira hala’o estudu komparativu iha fatin seluk, fó apoiu atu harii sede kooperativa nian”, refere.

Nune’e Prezidente Kooperativa CUP, Domingos Savio Belo, rekoñese moris iha situasaun ne’ebé maka difisíl tebes maibé ho fiar aan ba futuru sei fó prioridade ba ninia membru no mós jerasaun tuir mai.

“Maibé atu la’o ba oin ha’u husu parte SEKoop  atu halo akopañamentu nafatin ba ami, tanba kooperativa CUP ne’e ami harii ho inisiativa rasik hosi ho razaun úniku kooperativa maka bele rezolve povu kiik no mukit nia problema, nune’e ami hahú hosi ema na’in 15, no lansa iha loron 03 outubru 2021, ho ninia membru hamutuk ema nain 41, to’o agora sa’e ba hamutuk ema na’in 81, ho ninia kapital $11.286,00’`, akresenta.

Partisipante sira ne’ebé partisipa iha asembleia jerál ne’e maka hanesan Sekretáriu Administradór Munisípiu Lautem, Jacinto da Costa, Administradór Postu Administrativu Lospalos, reprezentante kooperativa sira seluk iha Lospalos Villa inklui, autoriedade lokál, no membru sira kooperativa sira.

Jornalista : Arminda Fonseca

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here