Prezidente Repúblika eleitu, José Ramos Horta hamutuk ho Prezidente Konferénsia Episkopál, Bispu Dioseze Maliana Don Norberto do Amaral akompaña hosi Arsebispu Arkidioseze Metropolitana Dili, Virgílio do Carmo da Silva, SDB, partisipa iha Konferénsia Episkopál Timorense (CET) iha salaun Oka, Surikmas, Dili, sesta (06/05). Imajen Tatoli/ Egas Cristóvão.

DILI, 06 maiu 2022 (TATOLI)—Prezidente Repúblika eleitu períodu 2022 to’o 2027, José Ramos Horta, husu ba uma kreda nia tulun atu tau matan ba refujiadu timor-oan sira-ne’ebé daudaun ne’e hela nafatin iha Kupang-Timor Osidentál tanba polítika no funu nia hahalok.

Laureadu Prémiu Nobel da Paz ne’e hateten, hosi Timor-Leste hahú ukun rasik an, Estadu TL  implementa polítika rekonsiliasaun hodi reintegra fila-fali timor-oan mai hosi Timor Osidentál ba kmonidade nia leet, hodi ko’alia beibeik rekonsiliasaun maibé agora haluha tiha timor-oan sira ne’ebé hela iha Kupang, Atambua no Nusa Tenggara Timur (NTT).

“Ha’u hakarak hateten, dala ruma ita ko’alia kona-ba rekonsiliasaun maibé haluha tiha timor-oan atus ba atus iha Atambua no iha NTT ne’ebá. Buat ne’ebé akontese iha 1999 no 1999 ba kotuk seida’uk rezolve 100%. Ne’eduni, nu’udar Prezidente ami sei iha prezidensia sei husu igreja nia tulun, sosiedade nia tulun atu ita tau matan ba alin, oan, avó sira iha Atambua, Kefa, Kupang no fatin ne’ebé-ne’ebé de’it,” José Ramos Horta hateten lia hirak ne’e iha ámbitu Ekipa Laborál Synodus Episcoporum CET, entrega rezultadu finál konsulta sínodo Bispo sira-ni’an iha nível Conferénsia Episcopal ba Prezidente CET, durante serimónia enseramentu sínodu nível Conferênsia Episcopal Timorense (CET), iha salaun Oka Rudal, Surikmas, Díli, sesta ne’e.

Nu’udar Prezidente Repúblika, nia buka nafatin promove dialógu la’ós dialógu altu nível maibé dialógu ho komunidade no igreja hanesan parseiru Estadu nian ne’ebé la’ós de’it Igreza katólika de’it, maibé ho konfisaun relijioza sira seluk hanesan protestante, musulmanu no sira seluk tan atu kria dame.

“Tanba, idak-idak ho nia posibilidade, ida-idak ho nia esperiénsia sekulár bele kontribui sai modelu ida dame, dame ne’ebé kle’an, modelu rekonsiliasaun ne’ebé loloos maske Timor-Leste mosu problema barak, maibé bele sai hanesan Oasis (bee-matan) ba dame hodi kontinua inspira rejiaun tomak,” nia dehan.

Nune’e, Ramos Horta husu atu Igreja Katólika hanoin lisuk kona-ba miserikordia divina tuir Papa Francisco I nia pensamentu, atu nune’e Igreja no Estadu bele hamutuk tau-matan ba rekonsiliasaun iha Timor-Leste.

Entretantu, Prezidente Repúblika eleitu ne’e hateten presiza tane polítika hotu-hotu ne’ebé bele hetan sistema polítika edukasaun ne’ebé di’akliu, presiza tau atensaun liu-liu emerjénsia edukativa iha igreja katólika nia laran no mós iha eskola públika sira. 

Polítika ne’e nia hala’o bainhira sai Prezidente Repúblika (2017-2012) hodi tau atensaun boot ba setór edukasaun no ninia xave ida mak tenke prevee iha Orsamentu Jerál Estadu (OJE) ne’e tenke aumenta pelumenus to’o 20%.

“Ita haree been estar, materiál, espirituál, língua ne’e sai diak presiza instrumentu prátiku di’ak ho konkretu ba edukasaun. Iha ne’e, Orsamentu Jerál Estadu ne’e, ita tenke aumenta pelemenus bele to’o 20%. Tanba, rai balun hanesan Vietname, ezemplu, orsamentu ba edukasaun boot tebes 20%-resin. Ida-ne’e ita tenke aumenta, atu ita hadi’a infrestrura eskola, atu dada bee moos, saneamentu, saúde ba labarik, klínika iha eskola no kualidade iha ensinu no mestre sira,” Horta hateten.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here