Ponte Noefefan iha Oe-Cusse. Imajen/ZEESM

DILI, 06 maiu 2022 (TATOLI) – Rejiaun Administrasaun Espesiál Oé-Cusse Ambeno (RAEOA) liuhosi Gabinete Unidade Turizmu Komunitáriu, halo promosaun turístika liuhosi portál www.visitoecusse.tl, ho objetivu atrai vizitante sira ba Oé-Cusse.

“Ohin ne’e ami mai halo promosaun ba ami-nia website turizmu nian, oinsá fó informasaun barak kona-ba turizmu iha Oé-Cusse ba universitáriu sira iha nasionál oinsá bele hatene informasaun barak kona-ba turizmu nian iha rai Oé-Cusse”, Prezidente RAEOA, Arsénio Bano, hateten iha Muzeum Rezisténia.

Bano revela, promosaun poténsia turístika ida ne´e atu hatudu katak nasaun Timor-Leste iha mós sidade kiik ida ne’ebé furak atu bele atrai ba turista ka vizitante, hahú hosi nasionál no mós internasionál sira atu bele ba vizita Oé-Cusse.

“Tanba ita halo ona hosi konsensializasaun komunidade nian, sira komprende ona katak turizmu ne’e sei fó benefisia ba sira, liuliu ba sira agrikultór sira, tanba bainhira ema ba vizita Oé-Cusse ema bele sosa sira-nia produtu hanesan, modo, ai-fuan no sira seluk, entaun liuhosi promosaun website ne’e ita hatudu fatin turizmu sira iha Oé-Cusse ba ita-nia maluk sira”, refere.

Fatin turístika iha  Oé-Cusse iha transporte ne’ebé fasilita ba vizitante sira karik ba Oé-Cusse bele fasilita vizitante sira hakbesik-aan ba fatin turizmu sira iha RAEOA.

“Tanba Oé-Cusse nu’udar sidade ne’ebé iha istória boot iha Timor-Leste, nakonu ho fatin turizmu hanesan, Oesílo, Pássabe, monumentu Lifau, Fatu-Suba, Fonte Sagrada, monumentu Lifau, Antiga Semitériu da Santa Rosa, no seluk tan”, katak.

Poténsia turístika rejionál ne´e mós autoriedade sira prepara saneamentu báziku iha Oe-Cusse atu fasilita bainhira turista sira hakarak vizita beleza Oe-Cusse.

Iha fatin hanesan, Vise Ministra Turizmu Komunitária Kulturál, Inácia da Conceição, hateten promosaun ba universitáriu sira ne’e importante tebes, tanba RAEOA nu’udar estatutu ketak ne’ebé iha podér kria website hodi dezenvolve ekonómia atu atrai vizitante sira ba Oé-Cusse.

“Ha’u sente website turizmu ne’ebé agora RAEOA halo ona fiar katak ba munisípiu seluk tempu sei to’o halo hotu hanesan ho RAEOA tanba iha dekretu lei kona-ba podér lokál dezentralizasaun bele fó poder ba sira bele promove turizmu nian liga ba nivél munisípiu”, afirma.

Nune’e, promosaun ba website turizmu Oé-Cusse, Gabinete Unidade Turizmu Komunitáriu servisu hamutuk ho parseiru internasionál hanesan Programa Nasaun Unida ba Dezenvolvimentu (PNUD) ho orsamentu kriasaun portál hamutuk rihun $30.

Jornalista : Arminda Fonseca

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here