Debate no votasaun deputadu Parlamentu Nasional ba Orsamentu Jeral Estadu 2022 iha sala plenária Parlamentu Naasionál, kuarta (15/12/2021). Imajen TATOLI/António Gonçalves

DILI, 06 maiu 2022 (TATOLI)— Líder Bankada Parlamentár, sesta (06/05), halo diskusaun no aprovasaun ba kalendáriu no giaun diskusaun Orasamentu Retifikativu (OR).

“Ohin, líder bankada Parlamentár aprova kalendáriu no giaun ba diskusaun  Orsamentu Retifikativu iha faze jenerálidade no espesiálidade ne’e sei hahú iha loron segunda (9/05),” Vise Sekretária Mesa Parlamentu Nasionál, António Maria Nobre Amaral Tilman, hateten ba jornalista sira hafoin ramata enkontru líder bankada iha Parlamentu Nasionál, sesta ne’e.

Bazeia ba kalendáriu no giaun ne’ebé líder bankada sira aprova katak debate OR sei finaliza durante loron tolu, hahú hosi loron 9 maiu too 11 maiu.

Orsamentu Retifikativu ne’e ho karakter urjénsia, tanba ne’e diskusaun faze jeneralidade iha loron ida de’it mak iha loron 9 maiu no iha faze espesialidade mak loron rua, hahú hosi loron 10 maiu too 11 maiu,” nia esplika.

“Relatóriu pareser ba iha Orsamentu Retifikativu parte komisaun C, konklui ona iha tuku 16:00, lokoraik ne’e,”nia akresenta.

Proposta OR ho montante billaun $1,129, ne’ebé prevee ba transferénsia públika $1,837,634.189, bens no servisu $466,877.382, kapitál dezenvolvimentu $390,177.399, saláriu no vensimentu $250,537.130 no kapitál menór $41,914.097.

Alende ne’e, Líder Bankada halo apresizaun no aprovasaun ba giaun sesaun solene ba Prezidente Repúblika eleitu iha loron 19 maiu.

Líder Bankada sira halo mós aprovasaun ba dokumentu internasionál ida, ne’ebé hosi Amu Papa kona-bá fraternidade úmanu, ne’ebé Parlamentu Nasionál delibera ka aprova liuhosi rezolusaun ida, hodi Governu Timor-Leste bele opta, nune’e Governu bele tau iha prátika implementa atu bele hanorin iha eskola sira.

Nune’e mós, Líder Bankada sira aprova sesaun solene komemorasaun tinan-XX ba Konstitusaun Repúblika Demókratika Timor-Leste, ne’ebé sei hala’o iha Parlamentu Nasionál no hetan partisipasaun direita hosi Prezidente Repúblika Timor-Leste no alta entidade nasaun nian inklui Prezidente Repúblika Portugál no Prezidente Repúblika Indonézia.

Notísia relevante: 9 maiu, PN-Governu hahú debate proposta OR iha jeneralidade

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here