Prezidente Konsellu veteranu. Vidal de Jesus "Riak Leman". Imajen Tatoli/Francisco Sony.

DILI, 06 maiu 2022 (TATOLI)—Prezidente Konsellu Kombatente Libertasaun Nasionál (CCLN-sigla portugés), Vidal de Jesus “Riak Leman”, hateten iha loron restaurasaun independénsia ba dala-XX ne’e Estadu sei la kondekora veteranu sira tanba orsamentu laiha.

“Tinan ida-ne’e liu-liu loron 20 maiu 2022, ita laiha orsamentu entaun laiha kondekorasaun ba veteranu sira,” Vidal de Jesus dehan ba Agência TATOLI, via telefónika, kinta ne’e.

Mezmu kada tinan antes Governu propoin no Estadu fó kondekorasaun ba veteran sira-ne’ebé luta ba ukun rasik-an ne’e, maibé ba komemorasaun loron restaurasaun independénsia ba dala-XX (20 maiu 2002-20 maiu 2022) sei la realiza.

“Maibé ami halo planu atu kondekora fali ita-nia veteranu sira iha 28 novembru 2022 no ida-ne’e mós ami komesa prepara ona, sé-sé mak atu simu kondekorasaun hosi Estadu Timor-Leste,” nia dehan.

Riak Leman hatutan, Governu halo ona preparasaun maibé parte seluk mós sei hein orsamentu ba tinan ida-ne’e nian liu-liu ba asuntu kondekorasaun veteranu nian.

“Bainhira osan iha ona entaun ami taka sai naran iha munisípiu 12 inklui Rejiaun Administrativa Espesiál Oé-Cusse Ambeno (RAEOA) fulan ida antes, nune’e veteranu sira haree no karik iha reklamadu konserteza nia sei la kondekora,” nia dehan.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here