Ospitál Referénsia Covalima. Imajen TATOLI/Eugénio Pereira.

COVALIMA, 06 maiu 2022 (TATOLI)–Diretora Apoiu Diagnóstika no Terapriotiku, Judit Imaculada, informa iha janeiru to’o maiu ne’e Ospitál Referénsia Covalima rejista moras Infesaun Vias Respiratória Aguda (IRA) hautuk 787.

“Hahú iha fulan janeiru to’o maiu iha ne’e, ita rejista moras tipu10 maibé hosi moras sira-ne’e rejista moras Infesaun Vias Respiratória Aguda (IRA) mak aas hamutuk 787 kompostu hosi mane 456 feto 463,” Judit Imaculada hateten ba jornalista sira, iha nia knar fatin iha Ospitál Referénsia Covalima, sesta ne’e.

Tipu moras 10 ne’e mak hanesan moras IRA, Dengue, Fever Syndrome, Bronchiolitis, Gastroenteritis Acute, Bronchitis, Broncopnemonia, Pneumonia, Bronchitis Acute no Podermatitis.

Hosi moras tipu 10 ne’e númeru moras Infesaun Vias Respiratória Aguda mak aas liu no tuir kedas moras dengue 97 kompostu hosi mane 49 no feto 66, moras Fever Syndrome kompostu hosi mane 50 no feto 51, moras Bronchiolitis 80, Gastroenteritis Acute 54, Bronchitis 33, Broncopnemonia 22, Pneumonia 22, Bronchitis Acute 20, Podermatitis 18.

Aleinde rejista iha sala konsulta OPD, iha sala pediatria mós Ospitál referénsia kontinua rejista moras IRA aas 498 kompostu hosi mane 178 no feto 378 no tuir mai mak moras gastritis acute 108 kompostu hosi mane 40 no feto 68.

Moras Infesaun Vias Respiratória Aguda (IRA)

Moras infesaun Vias Respiratória Aguda (IRA) mak infesaun viral (infeksaun ne’ebé kauza hosi virus) ne’ebé akontese iha ita-nia dalan iis nian. Bainhira ita dada iis anin sei halai tuir ita-nia dalan iis nian antes to’o iha pulmaun. Normalmente ita-nia dalan iis hahú ka forma hosi Inus, Kavidade nasal (inus kuak), faringe no laringe (kanál rua ne’ebé nia lokalizasaun iha kakorok).

Anin sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha ita-nia dalan-iis sei provoka ka halo ita sente susar no la konfortavél bainhira dada iis, no nu’udar konsekuénsia sei halo ita-nia isin falta anin hodi hala’o nia funsaun ho di’ak. Moras ida-ne’e fasil tebes da’et no fasil tebes atu kura.

Kauza hosi Infesaun Vias Respiratória Aguda

Moras IRA kauza hosi virus no bakteria ne’ebé invade diretamente ita-nia dalan iis liuhosi matan, inus no ibun. Virus sira-ne’ebé hamosu moras ne’e mak hanesan Rhinovirus, Coronavirus, Virus parainfluenza, no adenovirus.

Fatór sira-ne’ebé kontribui hetan moras IRA

Fatór sira-ne’ebé kontribui atu hetan moras IRA mak hanesan (1) Relasaun ho Individu; Laabarik sira-ne’ebé la simu imunizasaun, bebé ne’ebé la hetan susu hosi inan, bebé no labarik sira menór ho idade tinan ida, sistema imunolojia fraku (daya tahan tubuh lemah), má nutrisaun, moras krónika, ijiéne pesoál ne’ebé la di’ak.  

Relasiona ho Ambiente mak; Mudansa temperatura ambientál, poluisaun (rai-rahun), asinamentu (kepadatan, overcrowding), falta ventilasaun iha uma, fumadór barak (su’ar hosi sigaru bele hasa’e insidénsia ba moras ne’e) no ahi-su’ar.

Transmisaun

Moras Infesaun Vias Respiratória Aguda (IRA) transmite ka da’et liuhosi kontaktu direta (koali’a, fani, kabeen) ho ema ne’ebé hetan tiha ona moras ne’e.

Sintóma

Moras Infesaun Vias Respiratória Aguda (IRA) sei hatudu sinál no sintóma hanesan; Inus been turu no suli ka inus metin, me’ar (me’ar maran), isin kolen ka baruk, isin manas (dalaruma), garganta moras, no ulun moras (dalaruma).

Tratamentu

Tratamentu ba iha moras infesaun vias respiratória aguda (IRA) iha oin rua (2) mak tratamentu medikamentoza (ho aimoruk) no tratamentu non-medikamentosa (la uza ai-moruk).

Tratamentu medikamentoza (ho aimoruk): médiku sira mak sei fó aimoruk bainhira ita ba hala’o konsulta iha sentru saúde ka iha ospitál. Tratamentu non-medikamentoza (tratamentu la ho ai-moruk): tratamentu ne’ebé prátiku no ita bela halo hanesan suas ho bee manas nia su’ar, hemu bee no jus barak, deskansa barak no selu-seluk tan.

Prevensaun

Moras infesaun vias respiratória fasil tebes atu kona ema maibé fasil tebes mós atu prevene, sé ita iha konsiénsa no kultura saudavel. Asaun ka hahalok sira-ne’ebé ita tenke halo hodi prevene moras ne’e mak hanesan; fase liman ho sabaun, hadook aan hosi ahi-su’ar no rai-rahun, taka inus no ibun bainhira fanin ka me’ar, susu-been ekskluzivu ba bebé foin moris to’o fulan neen (6), labele fuma besik, halo vasinasaun, no kuidadu ijiéne pesoál.

Jornalista : Celestina Teles

Editor       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here