INFORDEPE kapasita manorin-na’in sira hosi pré-eskolár iha RAEOA atu dezenvolve koñesimentu karatér estudante. Imajen Tatoli/Abílio Elo Nini.

OÉ-CUSSE, 06 maiu 2022 (TATOLI) – Ministériu Edukasaun, Juventude no Desportu (MEJD), liuhosi Institutu Nasionál Formasaun Dosente no Profisional Edukasaun (INFORDEPE), fasilita formasaun ba profesór no dirijente sira hosi ensinu pré-eskolár iha Rejiaun Administrativa Espesiál Oé-Cusse Ambeno (RAEOA), hodi dezenvolve no koñese karáter estudante iha ambiente eskola.

Formadora hosi INFORDEPE, Ercília Araújo, informa, matéria prinsipál iha formasaun ne’e kona-ba dezenvolvimentu labarik, tanba manorin sira iha pré-eskolár, persiza hatene no koñese karáter labarik sira-nan, tuir faze labarik nian.

Tanba maioria labarik eskola iha ensinu pré-eskolár ho tinan tolu to’o haat, entaun presiza konsiénsia no pasiénsia hosi manorin sira atu atende ho vontade, nune’e bele enkoraja sira atu iha vontade badinas ba eskola.

“Entaun iha semana ne’e ita ko’alia de’it kona-ba dezenvolvimentu labarik nian, ba parte koknitivu, fíziku, lian no sosiál emosionál, ida-ne’e ami tenke hakle’an atu kapasita nafatin manorin sira hodi hala’o sira-nia kna’ar ho didi’ak tulun oan-sira iha pré-eskolár iha RAEOA,” Ercilia Aroujo, hatete iha salaun edukasaun Santa Rosa Oé-Cusse, sesta ne’e.

Nune’e formasaun ne’e bele sai hanesan referénsia iha prosesu aprendizajen bele aplika iha eskola idak-idak, hodi kontribui eduka oan-sira tuir dalan ne’ebé loos, hodi foka ba eskola no matéria ne’ebé hetan iha eskola.

Formandu, Aida Isabel Fátima Neves, nu’udar responsável ensinu pré-eskolár Atoni Oé-Cusse, senti orgullu tanba hetan formasaun hodi hasa’e abilidade nu’udar manorin hodi hadi’a prestasaun serbisu iha ambiente eskola.

“Formasaun ne’e importante tebes, ami senti kontenti tanba liuhosi formasaun ne’e bele sai ami-nia abilidade nu’udar manorin nian, hodi hanorin ami nia oan-sira iha eskola ho di’ak liután ba futuru,” nia orgullu.

Formasaun ne’e hala’o durante loron lima, hahú iha segunda 02 to’o sesta 6 maiu ne’e, ne’ebé envolve ensinu pré-eskolár hamutuk 16 mai hosi sub-rejiaun Oésilo, Pássabe, Nítibe no Pante Makasar.

Jornalista      : Abílio Elo Nini
Editór            : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here