Prezidente IGE, Hermenegilda da Costa Laurentina hamutuk ho autoridade lokál inaugura estrada rurál ho distánsia 7,400 Km, ne’ebé lokaliza iha Knua Ailok-laran, Suku Dotik, Postu administrativu Alas, Munisípiu Manufahi, sesta (06/05). Imaje Tatoli/Argentina Cardoso

MANUFAHI, 06 maiu 2022 (TATOLI)-Estrada rurál ho distánsia 7,4 km, ne’ebé lokaliza iha knua Ailok-laran, suku Dotik, postu administrativu Alas, munisípiu Manufahi, sesta ohin, inaugura ona husi Prezidente Institutu jestaun ekipamentu (IGE, sigla portugés), I.P, Hermenegilda da Costa Laurentina.

Estrada rurál ho distánsia 7,4 Km, ne’ebé lokaliza iha Knua Ailok-laran, Suku Dotik, Postu administrativu Alas, Munisípiu Manufahi, inauguradu husi Prezidente Institutu jestaun ekipamentu (IGE, sigla portugés), I.P, Hermenegilda da Costa Laurentina. Imajen Tatoli/Argentina Cardoso

Estrada ne’e hanesan estrada foun ne’ebé loke husi IGE. Prosesu loke estrada foun ne’e la’o durante fulan lima nia laran hodi fasilita movimentu diária populasaun suku Dotik nian.

Prezidente IGE, Hermenegilda da Costa Laurentina, hateten Governu esforsu loke estrada rurál atu fasilita movimentu komunidade nian ho distánsia 7,4 km. IGE nia serbisu mak loke estrada foun ho durasaun fulan lima hahú husi jullu to’o dezembru 2021.

“Estrada ne’e atu dura ba tempu naruk presiza autoridade lokál hakbesik an ba Ministériu obras públika rejionál, atu nune’e bele tau-matan ba estrada rurál ne’ebé IGE, I.P loke ona,” Autoridade másima IGE afirma liuhusi diskursu perante autoridade lokál no komunidade Suku Dotik, ohin.

Iha biban ne’e, Filomeno Tilman reprezenta administradór munisípiu Manufahi agradese ba IGE no ekipa tomak tanba bele loke ona estrada husi kruzamentu to’o tasi ibun ho distánsia kilometru hitu resin. “Estrada ida ne’e sei fasilita movimentu komunidade no mós programa governu nian iha tempu oin mai”.

Administradór postu Alas, Leopoldo Barreto reprezenta komunidade aldeia Dato Lor, suku Dotik agradese ba governu liuhusi IGE tanba oferese ona estrada rurál ne’e.

“Ha’u lori komunidade knua Dato Lor, suku Dotik agradese ua’in ba IGE tanba loke ona estrada ne’e. Estrada ida ne’e la’ós komunidade suku Dotik de’it mak sai benefisiáriu maibé peskadór husi Betano, Fatuberliu no Natarbora mós bele asesu hotu hodi buka ikan”.

Xefe suku Dotik, Sebastião da Costa, sente kontente ho estrada foun ba nia komunidade maibé husu ba IGE sebele asegura estrada rurál ne’e atu bele halo mós bee-dalan hodi nune’e estrada ne’e bele dura ba tempu naruk.  “Estrada loke ona maibé prezisa mós loke bee-dalan atu nune’e bele asegura kualidade estrada ba tempu naruk”.

Iha serimónia inaugurasaun estrada rurál ne’e, komunidade suku Dotik hamutuk ho lia-na’in entrega deklarasaun rai ba prezidente IGE, IP, rai ektare tolu, atu bele utiliza husi Estadu ba interrese nasionál.

Entretantu, suku Dotik hanesan suku ida husi suku Aituha, Mahakidan, Taitudak ho Umaberloik, iha postu administrativu Alas, munisípiu Manufahi. Suku ne’e iha aldeia hanesan Lacaluan, Sarin, Weberek. Totál populasaun Suku Dotik 2.295.

Jornalista: Argentina Cardoso

Editór: Rafy Belo

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here