Ministru Ensinu Superiór, Siénsia no Kultura, Longuinhos dos Santos. Imajen TATOLI/Egas Cristóvão

DILI, 06 maiu 2022 (TATOLI) – Konsellu Ministru halo ona primeiru alterasaun ba Dekretu lei númeru 2/2019, 5 de marsu kona ba lei orgánika Ministériu Ensinu Superiór Siénsia no Kultura (MESSK)  hodi bele hamosu tan orgaun konsultivu foun iha Ministériu ninia laran.

Ministru MESSK, Longuinhos dos Santos hateten,  alterasaun dahuluk dekretu lei númeru 2/2019, 5 de marsu kona ba lei orgánika  MESSK nian ho intensaun hodi bele hamosu tan orgaun konsultivu foun   ne’ebé tuir Ministériu bele fasilita liu tan servisu MESSK nian. Tanba, antes ne’e MESSK hamosu ona Konsellu Reitór, no agora ho primeiru alterasaun ne’e hamosu tan Forum Estudante.

“Forum ne’e ninia intensaun atu hamosu diskusaun hodi apoiu liu tan polítika Ministériu nian. Asosiasaun ka forum estudante ida ne’e ita konvida hosi Universidade hotu atu fasilita konsultasaun entre Ministru ho forum estudante sira,” dehan nia ba jornalista sira hafoin remata  enkontru Konsellu Ministru ekstra ordináriu iha Palásiu do Governu, sesta ne’e.

Nia haktuir tan katak alende hamosu diresaun ka forum sira, MESSK mós halo tan separasaun servisu, ne’ebé Diresaun Jerál Administrativa Finansas sei fahe tan ba rua. Diresaun Nasionál Administrasaun Finansas Lojístika no Patrimóniu sei fahe  ba Diresaun Nasionál Administrativa Finansas no mós Diresaun Nasionál Lojistiku Patrimóniu ne’e aliña polítika VIII governu nian atu halo jestaun kona ba patrimóniu Veíkulu operasionál nian. Tanba ne’e MESSK hamosu tan alterasaun ba lei refere.

Ministru dehan tan, hosi alterasaun ne’ebé KM  halo inklui mós ba Diresaun Nasionál Estatístika ne’ebé maka agora integra iha Diresaun Jerál Ensinu Superiór nian. Diresaun Estatístika ida ne’e atu haree kona ba dadus ka database estudante no profesór sira iha territóriu nasionál.

“Ita halakon ona Diresaun Nasionál Planeamentu no Paresér Estatístiku. Ita hamosu fali tan Unidade Planeamentu Paresér no Kooperasaun. Unidade ida ne’e ita kria atu ninia konsultasaun ne’e direita ba Ministru Ensinu Superiór,” Nia haktuir.

Governante ne’e hatutan tan,  iha primeiru alterasaun MESSK  halakon tan koordenasaun tékniku kona ba apoiu koordenasaun estudante. Ninia kompeténsia ne’e integra fali ba iha parseria no kooperasaun ba Unidade no Planeamentu ninian. Ida ne’e akontese atu nune’e bele haree liu ba estudante no adidu iha rai li’ur.

Jornalista: Tomé Amado

Editóra   : Armandina Moniz

  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here