DILI, 06 maiu 2022 (TATOLI) – Eskola Ensinu Báziku Filiál (EBF) rua iha Munisípiu Bobonaru simu ona materiál emerjénsia hosi Diresaun Nasionál Asaun Sosiál Eskolár (DNASE) hodi konstroi aula foun ba prosesu aprendizajen ba estudante sira.
Diretór Nasionál Asaun Sosiál Eskolár, Joaquim Martins hatete bazeia ba servisu verifikasaun ne’ebé DNASE halo ba eskola eskola rua ne’ebé hasoru problema dezastre naturál, hanesan Eskola Badut Mean no Eskola Rai-Fu iha postu administrativu Bobonaru. Eskola rua ne’e simu ona apoiu materiál emerjénsia.
“Ita prosesu ona hodi harii tan aula temporaria rua iha eskola Badut-Mean ne’ebá besik iha fronteira,” dehan Joaquim ba Tatoli iha ninia kna’ar fatin MEJD Vila Verde, sesta ne’e.
Diretór ne’e informa katak materiál emerjénsia ne’ebé DNASE distribui ba eskola rua ne’e kontinua halo kontaktu ho autoridade lokál sira atu koopera ho inan aman hodi bele organiza malu hahú konstroi ona aula atu labarik sira labele lakon matéria.
Joaquim haktuir katak alende apoiu eskola EBF Badut Mean, DNASE mós kontinua apoiu tan material emerjénsia ba eskola EBF Rai-Fu hodi harii tan aula rua iha sentru ensinu báziku Rai-Fu, postu administrativu Bobonaru.
“Ita apoiu materiál sira ne’e tanba simu pedidu hosi komunidade ho razaun alunu sira ne’ebé eskola iha EBF Rai-Fu ne’e barak mak hela do’ok ho distánsia kilometru lima to’o hitu. Tanba, ne’e sira husu atu hadi’a tan eskola komunidade atu alunu sira bele asesu ba edukasaun
Entretantu Joaquim husu ba parte eskola no autoridade no inan aman sira atu halo kooperasaun hodi nune’e bainhira materiál sira ne’e too, bele apoiu malu hodi aselera prosesu reabilitasaun ba eskola refere.
Jornalista: Tomé Amado
Editóra : Armandina Moniz
