Prezidente Asosiasaun Futeból Bobonaro, Domingos Gouveia Moniz. Imajen Tatoli/Sérgio da Cruz.

BOBONARO, 06 maiu 2022 (TATOLI) – Prezidente Asosiasaun Futeból Bobonaro (AFB), Domingos Gouveia Moniz, fó-sai katak jogu futeból sub-23 époka 2022 sei abertura iha loron 14 fulan ne’e iha kampu futeból Maliana Vila.

Nia hateten, planu asosiasaun ne’e loloos ne’e hahú uluk mak jogu futeból sub-19 iha loron 7 fulan-maiu, maibé razaun tanba jogadór sira-ne’ebé durante ne’e partisipa iha klubu sira eziste iha munisípiu Bobonaro barak mak remata ona eskola nível sekundária ba kontinua eskola universitáriu sira iha kapitál Dili nune’e klubu sira menus jogadór.

Komisaun organizadora sira riska hela ba kampu futeból Maliana hodi halo preparasaun ba jogu époka 2022 nian. Imajen Tatoli/Sérgio da Cruz.

“Ita-nia planu sei abertura iha loron 14 fulan ida-ne’e, maibé ami fó kritériu kahur mós ho jogadór sub-19 balun,” nia informa ba jornalista sira, iha kampu Futeból Maliana, sesta ne’e.

Dadus klubu ne’ebé eziste iha munisípiu Bobonaro no sai ona membru AFB hamutuk 16, maibé daudaun ne’e foin klubu neen mak rejistu iha komisaun atu kompete tasa eventu futeból époka ne’e.

Maske nune’e parte komisaun halo ona preparasaun tesi ona duut iha kampu futeból Maliana, pinta guardiaun, tau tinta ba riksu markasaun nune’e eventu ne’e bele la’o ho di’ak.

“Ami sei fó oportunidade to’o loron 12 maiu agora mak taka rejistrasaun, tanba ne’e ha’u husu ba klubu sira-ne’ebé tuir kompetisaun tinan-tinan, sé bele tempu badak ba ona s

ede asosiasaun atu rejistu nune’e bele partisipa mós iha jogu ne’ebé sei abertura iha loron 14maiu ne’e,” nia fó hanoin.

Planu asosiasaun iha époka ida-ne’e sei realiza eventu dala-haat, tanba ne’e hafoin jogu ne’e sei kontinua kedas ho jogu sub-16, tuir jogu femenina no ikus jogu sub-livre maka taka kompetisaun futeból époka 2022.

Orsamentu ba realizasaun eventu ne’e Asosiasaun Futeból Bobonaro submete pedidu ba Federasaun Futeból Timor-leste (FFTL) to’o agora seiduak responde, tanba ne’e bainhira la hetan apoiu AFB mós iha fundu rasik bele realiza eventu ne’e.

Daudaun ne’e AFB iha ona árbitru kuaze na’in-37. Hosi númeru ne’e na’in-10 ho sertifikadu lisensa (C) kompostu hosi mane na’in-ualu, feto na’in-rua no restante maioria ho serfikadu bázika lisensa (D), maibé arbitru hirak-ne’e na’in 16 mak ativu hela no barak mak la ativu ona tanba okupadu ho serbisu seluk.

Jornalista   : Sergio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here