Deputadu Bankada CNRT, Adérito Hugo da Costa. Imajen Tatoli/ Egas Cristóvão.

DILI, 05 maiu 2022 (TATOLI)— Tribunál Distritál Dili (TDD), liuhosi Juis Evangelino Belo, kinta (05/05), deside absolve arguidu eis Prezidente Parlamentu Nasionál, Aderito Hugo da Costa hosi krime furtu agravadu  liuhosi dalan dada ahi ilegál iha tinan 2016.

Ministériu Públiku ne’ebé reprezenta hosi Prokuradór Rogério Veigas husu TDD atu aplika pena prizaun tinan rua no suspende ba tinan rua, tanba faktu no deklarasaun hosi sasin sira komprova katak arguido komete ka pratika duni krime furtu agravadu ne’ebé previstu iha artigu 251 no artigu 252 iha Kódigu Penál Timor-Leste.

Notisia relevante:  Selu ona multa $2.000, MP alega Adérito Hugo ho pena suspensaun tinan rua

“Tribunál deside absolve arguidu hosi krime furtu agravadu ne’ebé antes ne’e MP imputa ba arguidu ba fali krime furtu simples ne’ebé ho moldura penál, pena prizasaun tinan ida too tinan tolu no aplika multa hosi kodígu penál Timor-Leste.  Tanba arguidu momentu ne’e selu ona koima ba Estadu $2.000,” refere akordaun ne’ebé lee hosi Juís Evangelino iha sala julgamentu TDD.

Hafoin tribunál rona tiha parte Eletricidade de Timor-Leste (EDTL) ne’ebé aprezenta ba Tribunál katak arguidu komete ligasaun illegál, maibé hafoin tribunál halo tiha analiza ba deklarasaun sira ne’e, faktu sira komprova katak arguidu halo duni ligasaun illegal ho prejiizu ba Estadu hamutuk $990, maibé momentu ne’e arguidu kumpre hodi selu multa $2.000.

TDD mós konsidera valór prejuizu ne’ebé maka arguidu komete la too valór $1.000, tanba ne’e tribunál entende hahalok arguidu la komprova hanesan krime.

“Tribunál konsidera la adekuadu aplika pena prizasaun ba arguidu, maibé aplika de’it pena multa tinan ida ba arguidu tanba  hahalok  ne’ebé komete hosi arguidu la’ós krime,” nia afirma.

Hafoin tribunál akomula tiha kondisaun ekonómiku arguidu nian, tribunál  husu arguidu selu pena multa $30 kada loron, hahú hosi leitura akordaun ne’e too iha loron 250.

Desizaun ne’e, nia dehan tribunál foti imparsiálmente, laiha kazu ruma no kuandu arguidu la simu dezisaun ne’e. Tribunál   autoriza arguidu bele halo rekursu iha prazu loron 15 nia-laran. Tanba hahalok arguidu nian la’ós krime tribunál deside la tama ba iha rejistu kriminál.

Iha biban ne’e, Advogadu Privadu, Pedro Apariçio, dehan nia parte seidauk iha desizaun ruma atu simu dezisaun hosi Tribunál Primeira Intánsia nian ne’ebé aplika pena multa tinan ida ba nian kliente tanba sei halo estudu hafoin bele avansa ba rekursu.

“Ha’u ho ha’u nia kliente sei estuda hela tanba tuir lei ha’u nia kliente no Ministériu Públiku iha loron 15 atu halo rekursu ba desizaun Tribunál.  Tanba ne’e mak ami seidauk bele selu pena multa ne’ebé maka iha kuandu ami estuda ona oinsá atu halo rekursu ga lae ne’e maka ha’u nia kliente foin selu pena multa ne’e,” Advogadu ne’e dehan.

Audénsia julgamentu ne’e prezide hosi Juís kolletivu Evangelino Bello, José Gonçalves, Alvaro Freitas, Ministériu Públiku reprezenta hosi prokuradór Rogério Viegas no arguidu hetan asisténsia legál hosi Advogadu privadu Pedro Apariçio.

Notísia relevante:  Kazu Aderito Hugo, sasin deklara identifika fiu ne’ebé liga direta

Jornalista: Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here