Atleta sira hatudu respeitu ba bandira sira molok hakat ba iha Vietname 2022 hodi partisipa SEA GAMES 2022), Iha Palásiu Governu, kita (05/05). Imajen Tatoli/Francisco Sony

DILI, 05 maiu 2022 (TATOLI)-Atleta Timoroan, hamutuk na’in-13, tuir orariu sei desloka ofisiál bá nasaun Vietname iha loron 09 fulan-maiu 2022 hodi partisipa kompetisaun jogu SEA Games, ba dala 31 entre nasaun sira iha rejiaun Sudeste Aziátiku.

Primeiru-Ministru, Taur Matan Ruak, hala’o seremónia despedida ho kontinjente atletas no ofisias sira ne’ebé sei partisipa iha Jogus Sudeste Aziátiku ka SEA GAMES 2022 iha Vietname. Iha Palásiu Governu, kinta (05/05). Imajen Tatoli/Francisco Sony

Antes ne’e, atleta na’in 25 husi modalidade futeból u-23 desloka ona bá Malázia hodi halo preparasaun téknika atu oinsá bele joga hasaoru nasaun seluk iha eventu SEA Games ne’ebé sei hala’o iha Hanoi Vietname.

Notísia relevante : Embaxada TL iha Malazia apresia vitória selesaun U-23

Primeiru-Ministru, Taur Matan ruak, hafoin halo enkontru ho atleta no treinadór sira iha salaun Prezidensia Konsellu-Ministru Palásiu Governu Dili, otismista katak atleta hirak ne’e sei joga ho di’ak hodi hamorin Timor-Leste nia naran iha mundu internasionál.

“Ha’u hanoin tempu ona para ita kompete, naturalmente kompetisaun ida ne’e kuandu ita dehan kompete ne’e signifika treinu no investimentu kualidade, ne’e importante loos. Entaun ha’u kontenti tanba halo selesaun di’ak liu para partisipa reprezenta Timór iha SEA Games,” Taur Matan Ruak, hateten, kinta ne’e.

Nia dehan atu kompete ho di’ak, treinadór sira persiza tau atensaun másimu ba atleta sira atu oinsá treinu ho disiplina nune’e bele hetan hetan vitoria.

“Timor tomak iha imi-nia kotuk inklui ha’u, dala ruma ha’u laharee televizaun satán imi lakon ha’u lakohi ona maibé iha militár dehan nune’e, kuandu mais lakon iha forsa liután manan. Tanba ne’e ha’u fiar katak imi bele reprezenta Timór, ha’u reza, no husu boot ba matebian sira tulun imi nafatin la’ós de’it viajen maibé mós durante jogu sira to’o filafali mai Timór ho isin di’ak,” Taur otimista.

Iha fatin hanesan Sekretáriu Estadu Juventude no Desportu, Abrão Saldanha, informa atleta hirak ne’e hasoru difikuldade finanseira durante halo preparasaun tanba Governu la prevee iha orsamentu jerál Estadu 2022.

“Ita hatene katak iha tinan kotuk kuandu prepara orsamentu ne’e ita ho hanoin ida katak ita sei iha COVID-19 nia laran. Entaun iha difikuldade ruma maibé ho esforsu ho federasaun sira nian ho Komité Olímpiku Nasionál Timor-Leste (CONTL,sigla portugés) konsege duni lori sai atleta sira ne’e atu reprezenta ita hotu,” nia hateten.

Governante dehan, partisipasaun Timor-Leste nian iha eventu ne’e no hirak ne’ebé sei mai la’ós ho hanoin ida atu partisipa de’it maibé tenke mai ho prinsipiu ida katak partisipa atu kompete hodi manán.

Tuir nia husi atleta na’in-38, antes ne’e selesionadu hosi kampionatu nasionál no liga nasionál sira, tanba ne’e, Governu iha esperansa boot ba atleta sira atu kompete ho diginidade nu’udar Timoroan.

Partisipasaun Timor-Leste ho modalidade Atletismu, Taekwondo, Boxing, Natasaun, Karaté, Halterofilismu (Hiit Besi), no Futeból. Atleta Timoroan hamutuk na’in-38 maka partisipa iha eventu SEA Games ne’e.

Entretantu, jogu Sudeste Aziátiku (SEA Games, sigla inglés) ba dala-31 tinan 2021, ne’ebé sei hala’o iha Hanoi, Vietname, hahú loron 12 to’o 23 maiu 2022.

Durante eventu multidesportivu ne’e, sei iha kompetisaun hamutuk 526 hosi desportu hamutuk 40, ne’ebé antes ne’e Komisaun Organizadora hosi Komité Olímpiku Vietname halo ona evaluasaun no bazeia mós hosi regra Southeast Asian Games Federation (SEAGF).

SEA Games ba dala-31 ne’e, ba dahuluk sei aprezenta jogu Xiangqi ka xadres hosi Xina.

Eventu ne’e sei partisipa hosi ema maizumenus 10.000, kompostu hosi atleta, ofisiál, delegasaun no mídia ne’ebé sei halo kobertura.

Notísia relevante : Selesaun nasionál U-23 hala’o treinamentu iha Malázia

Jornalista : Antónia Gusmão.

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here