Pontu Fokál Inspesaun Traballu iha Oé-Cusse, Domingos Falo. Imajen Tatoli/Abílio Elo Nini.

OÉ-CUSSE, 05 maiu 2022 (TATOLI) – SekretAria Estadu Formasaun, Profisionál no Empregu (SEFOPE), liuhosi Diresaun Rejionál Traballu iha Rejiaun Administrativa Espesiál Oé-Cusse Ambeno (RAEOA), rejista disputa laborál iha fatin serbisu hamutuk rua iha trimestre dahuluk 2022.

“Iha janeiru to’o marsu, kazu disputa laborál nian iha trimestre dahuluk iha 2022, ita konsege rejista kazu rua iha empreza rua, relasaun ho hapara kontratu traballadór nian,” pontu fokál inspesaun jerál traballu RAEOA, Domingos Falo, hateten iha Oé-Cusse, kinta ne’e.

Pontu fokál ne’e fundamneta, kazu hirak-ne’e relasiona ho tipu kontratu liuliu hapara serbisu, traballadór la ho justifikasaun, maibé kazu laborál rua ne’e konsege rezolve ho meiu akordu koletivu, liuhosi negosiasaun bipartida iha serbisu fatin entre traballadór no empregadór.

Nia informa, kazu ne’e iha empreza ida hapara traballadór hamutuk ema na’in-haat (4), no kazu seluk privadu la’os empreza maibé hapara nia kondutór ida (1), maibé hafoin akontese traballladór hato’o kedas iha SEFOPE halo mediasaun no rekonsiliasaun atu buka solusaun.

Nune’e bainhira akontese hanesan ne’e, parte SEFOPE halo mekanizmu hodi rezolve, karik laiha solusaun, maka SEFOPE kontinua submete ba iha tribunál, tanba razaun arbitrajen iha Oé-Cusse seidauk iha.

“Maibé bazea kazu rua ne’e ita konsege rezolve liuhosi ami-nia mediasaun no rekonsiliasaun, tuir Lei Traballu artigu 55 kona-ba direitu indemnizasaun no artigu 56 kona-ba kompensasaun, maske hakotu kontratu maibé empregadór responsabiliza traballadór nia direitu hetan indemnizasaun,” nia katak.

Durante ne’e SEFOPE sosializa lei númeru 4/2012, 21 fevereiru, kona-ba Lei Traballu, ba entidade relevante sira hosi instituisaun Estadu, empregadór no traballadór.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here