Profesór sira tuir formasuan lian Português iha salaun EBF Samfuk. Imajen Tatoli/Celestina Teles.

COVALIMA, 05 maiu 2022 (TATOLI)—Formadór hosi Institutu Nasionál de Formacão de Docentes e Profissionais da Educão (INFORDEPE) fó formasaun lian portugés no metodolojia ensinu (metodologia do ensino) ba profesór na’in-17 iha munisípiu Covalima.

Formadór Nasionál hosi INFORDEPE, Jorge Alves Soares hateten, profesór sira-ne’e hahú tuir formasaun iha kuarta (04/05) ne’ebé sei ramata iha fulan-jullu tinan ne’e, tanba tuir rekezitu sira tenke kumpre oras 120 no bainhira profesór sira la kumpre, sei la hetan sertifikadu tanba la prenxe rekezitu.

“Ha’u hanoin ema hotu hatene lian portugés hanesan lian ofisiál ne’ebé hakerek ona iha konstituisaun RDTL. Ba profesór sira-ne’e importante tebes, tanba ita laiha profesór labele dezenvolve lian portugés aleinde metodolojia ensinu,” Jorge Alves Soares hateten ba jornalista sira iha EBF Samfuk, suku Camanasa, kinta ne’e.

Ho nune’e bazea ba lista provizóriu haruka hosi nasionál profesór na’in-55 mak sei tuir formasaun, maibé realidade iha terrenu hatudu profesór ne’ebé tuir formasaun hamutuk na’in-17 de’it.

“Ida ne’e mak realidade partisipasaun menus tanba kondisaun profesór balun hanorin dadeer no balun lorokraik maibé seidauk iha justifikasaun mai ha’u, tanba formasaun ne’e importante ba profesór sira maibe sira la mai ha’u la komprende,” nia dehan.

Formasaun ba profesór sira-ne’e hala’o iha munisípiu 12 inklui Rejiaun Administrativa Espesiál Oé-Ccusse Ambeno (RAEOA) hamutuk profesór 400-resin

Formandu Armando Nunes amarál hateten, nu’udar profesór ne’ebé tuir formasaun ne’e importante tebes tanba atu bele aumenta ninia kapasidade nu’udar profesór ida.

“Ha’u sente tuir formasaun ne’e di’ak ba ami, atu aumenta ami nia kapasidade nune’e bele iha kuñesementu di’akliu,” nia dehan.

Formasaun ne’e foku ba lian portugés kontinua ho nivél A2 tanba iha tinan kotuk tuir ona formasaun lian portugés iha nivél A1 bazea ba manuál sei kontinua nivél B1 ho B2 maibé depende ba profesór sira.

Tuir konstituisaun RDTL artigu 13 ko’alia kona-ba lian ofisál no nasionál ne’ebé iha alínea 1 hateten Repúblika Demokrátika Timór-Leste nia lian ofisiál mak Tetun no Portugés, iha alínea   2 ko’alia Estadu valoriza no dezenvolve Tetun no lian nasionál sira seluk.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here