Ofisiál Polisia Tránzitu hala’o hela pasa revista ba dokumentu motórizada ne’eb’e komunidade sira uza iha munisípiu Dili. Imajen Tatoli/Antonio Dasiparu.

DILI, 05 maiu 2022 (TATOLI)— Ekipa Konjuta Polisia Nasionál Timor-Leste (PNTL) munisípiu Dili, kuarta (04/05), halo operasaun kalan hodi halo apreensaun ba motór hamutuk 68.

Operasaun kalan ho tipu la’o-ain ne’ebé ekipa konjunta hala’o hahú hosi tuku 20:00 too 22:00, ho objetivu atu garante komunidade iha kapitál Dili moris iha situasaun hakmatek nia-laran.

Komandante PNTL munisípiu Dili, Superientendente Xefe Polisia, Henrique da Costa. Imajen TATOLI/Francisco Sony

“Horikalan ita halo pasa revista (check point) ba karreta no motorizada sira, iha Dili ita halo apreensaun ba motór hamutuk 51 no iha Metinaro liuhosi operasaun check point  ita mós  halo arpreensaun ba  motorizada hamutuk 17, nune’e apreensaun motór hamutuk 68″, Komandante  PNTL Munisípiu Dili, Superintendente Xefe Henrique da Costa hateten ba Agência TATOLi via telefónika, kinta ne’e.

Ekipa konjuta apreende motór hirak ne’e tanba laiha asesora hanesan espellu, uza kanu-resin no laiha dokumentu hanesan karta kondusaun.

“Horikalan,Polisia Tránzitu halo apreensaun liuhosi pasa revista no fó kedan koema ba ita nia infratór sira ne’e no tula kedan evidénsia hirak ne’e ba iha Komandu Munisipiu Dili, kuandu infratór sira selu hotu ona iha banku maka sira sei fila ba foti sira nia motór,” Komandante ne’e esplika.

Operasaun kalan ho tipu la’o ain ne’e Komandu Munisípiu Dili hetan apoiu hosi Tránzitu Munisípiu Dili, Unidade Espesiál Polísia (UEP), Unidade Patrollamentu Fronteira (UPF) no Forsa Reserva (Taskforce).

“Ami sei kontinua operasaun ida ne’e, hodi kontrola movimentu transporte públiku no privadu iha hodiasegura seguransa iha tempu kalan,” nia akresenta.

Jornalista: Natalino Costa   

Editór     : Florencio Miranda Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here