Primeiru-Ministru, Taur Matan Ruak. Imajen Tatoli/Francisco Sony.

DILI, 05 maiu 2022 (TATOLI) – Primeiru-Ministru (PM), Taur Matan Ruak, lansa rezultadu finál hosi peskiza ai-han no nutrisaun 2020 no planu estratéjia nasionál nutrisaun setór saúde 2022-2026.

Ratóriu rezultadu finál peskiza ai-han no nutrisaun tinan 2020 ne’e foku ba raes badak, kreskas, todan menus, todan sa’e liu.

Tuir prevalénsia má nutrisaun iha 2010-2020 hatudu katak labarik ihaTimor-Leste 47.1% mak sei hetan raes badak, 32.1% mak todan menus, 8.6% mak krekas, no 1.2% mak todan liu.

Bazeia bá prevalénsia iha leten mak Governu lansa planu estratéjia nasional ho objetivu estratéjiku neen mak hanesan, to’o iha tinan 2025, situasaun nutrisaun labarik ho idade menus hosi tinan lima, labarik idade eskola nian, adolosente sira no feto sira isin rua sira ne’e hadi’ak ona.

Nune´e, to’o iha tinan 2025, labarik ho idade menus hosi tinan lima, labarik idade eskola nian iha asesu ba kualidade triazen no tratamentu sedu ba má nutrisaun aguda no grave iha nivel hotuhotu. To’o iha tinan 2025 individu ho nesesidade espesiál iha ona asesu ba atendimentu nutrisaun ne’ebé ho kualidade ba sira nia bem estar, to’o iha tinan 2025, redús prevalénsia todan liu obesidade no DR-NCD.

To’o iha tinan 2025, favorável ba nutrisaun nian iha ambiente efetivu ida ne’ebé implementasaun intervensaun setór saúde ne’e kria ka estabelese no programasaun ne’ebé bazea ba evidénsia liuhosi monitorizasaun, avaliasaun, peskiza no vijilánsia nutrisaun nian ne’ebé la’o di’ak ona.

VIII Governu Konstitusionál iha hanoin hodi deside ona fó prioridade ba nutrisaun b programa Governu nian, tuir kompromísiu sira seguransa ai-han nian ne’ebé asume hosi Planu Estratéjiku Dezenvolvimentu Nasionál (PEDN) no aliña hamutuk ho Objetivu Dezenvolvimentu Sustentável (ODS) nian sira kombate ba hamlaha no ba ki’ak, hirak ne’e reprezenta fatór prinsipál sira ba prevalénsia subnutrisaun nian iha ita-nia sosiedade.

“Ita hotu rekoñese katak ezisténsia hosi ábitu nutrisaun nian ne’ebé di’ak ho ai-han ne’ebé ekilibrada no saudável, maka baze fundamentál ba kreximentu no dezenvolvimentu di’ak ba ita-nia sidadaun sira, liuliu labarik, adolesente no joven sira”, Taur Matan Ruak, refere liuhosi nia diskursu iha ámbitu lansamentu rezultadu finál peskiza ai-han no nutrisaun tinan 2020 nian iha Ministériu Finansa, Aitarak-Laran, Dili.

Nune’e, nutrisaun familiár ida ne’ebé di’ak mak promove redusaun risku ba moras ne’ebé hada’et, hodi hadi’a kondisaun sira ba kreximentu ida di’ak ba nível fíziku no psikolójiku.

Promove mós kondisaun adekuada sira ba produtividade ne’ebé di’ak iha atividade sósiu ekonómiku oioin, liuliu aprendizajen, akizisaun ba koñesimentu no kapasitasaun ba sevisu, ne’ebé garante rezultadu di’ak ba prazu naruk iha faze moris nian ne’ebé lahanesan.

“Preokupasaun sira ne’ebé mak ha’u asume ona nu’udar Presidente Repúblika iha tinan 2012 no prolonga to’o ohin loron, ho ninia lema atu “Investe iha nutrisaun ba saúde, edukasaun no produtividade ne’ebé di’ak ba ema” investimentu ida ne’ebé justifika ona hosi estatístika internasionál no nasionál sira ne’ebé hatudu katak hosi ema na’in tolu sofre má-nutrisaun, ne’ebé afeta ba labarik milliaun 667 ho idade tinan-lima mai kraik, ne’ebé domina iha Timor-Leste ho 24.9% iha tinan 2018 ne’ebé mak ita hakarak atu hamenus ba taxa ida ho 0% iha tinan 2030,” nia dehan.

Nune’e, milliaun 151 mak sofre Nanizmu (Stunting) no má-nutrisaun krónika ne’ebé kauza hosi falta nutriente sira, ne’ebé domina iha Timor atinje ba 47.1% iha tinan 2020 no  hakarak redús ba taxa ida ho 25.1% to’o 2030, no milliaun 51 maka sofre rakitizmu no isin eskelétiku infantíl, ne’ebé domina iha Timor-Leste atinje ba 8.6% iha tinan 2020 no hakarak redús ba taxa ida ho 3.0% to’o 2030.

“Millaun 38 maka sofre nivel obezidade Infantíl, ne’ebé domina iha Timor-Leste atinje ba 1.2% iha tinan 2020 no sei la ultrapasa liu taxa 1.5% iha 2030, iha momentu ne’ebé maka Mundu ultrapasa ona ema Biliaun hitu no iha ne’ebé ita asiste iha parte balun, iha aumentu ema ne’ebé laiha mikronutriente no kalória nian sira,” nia hateten.

Iha parte seluk, aumenta ema ho obezidade no diabetes, ne’e aumenta risku mortalidade maka’as no hatún índise produtividade nian, importante maka Timor-Leste nafatin adota medida prátika no konkreta sira ne’ebé envolve setór hotu-hotu iha sosiedade, ema, família, autoridade, organizasaun sira sosiedade sivíl no parseiru sira ba dezenvolvimentu, iha espíritu loloos ba komunidade alimentár nian hodi hadi’a di’ak liu nutrisaun no seguransa alimentár.

Medida sira ne’ebé adopta Estratéjia Nasionál Nutrisaun nian mak iha tinan 2014-2019, Polítika Nasionál ba Seguransa Alimentár no Nutrisaun nian iha 2017, Planu Asaun Nasionál nian ida kontra Hamlaha no Má nutrisaun iha 2015-2024.

Planu Asaun Nasionál Konsolidasaun nian ba Seguransa Alimentár no Nutrisaun (CNAP FNS 2020 – sigla lian portugés) ne’ebé aplika hosi KONSSANTIL, nu’udar órgaun estratéjiku interministeriál  no intersetoriál, ne’ebé kompostu hosi entidade públika no privadu sira, ho reprezentante hosi parseiru dezenvolvimentu sira no hosi entidade sira sosiedade sivíl, nasionál no internasionál nian sira.

“Medida sira ne’ebé justifika Timor-Leste nia adezaun, iha fulan Outubru tinan 2020, ba Scalling Up Nutrition Movement (SUN), no ne’ebé kontrola hosi Sekretáriu Jerál Nasaun Unida, António Guterres, justifika mós ita-nia partisipasaun iha tinan kotuk, iha Simeira Komunidade País Lian Portugés (CPLP) nian iha Luanda no iha Simeira Preparatóriu Roma nian (Itália), ne’ebé kulmina ho realizasaun Simeira Mundiál kona-ba sistema Alimentár (Food System Summit) iha Nova Iorque, iha fulan setembru tinan 2021 no Simeira Nutrisaun nian iha Tókiu (Tokyo Nutrition for Growt) ne’ebé realiza ona iha fulan dezembru tinan 2021.

Medida sira ne’ebé aposta ba relasaun ne’ebé eziste entre nutrisaun no saúde, ohin sei estende tan ho lansamentu Planu Estratéjiku Nasionál Nutrisaun nian iha Setór saúde entre tinan 2022 no tinan 2026, no sei reforsa loloos rezultadu sira ne’ebé hotuhotu hakarak hetan iha área ne’e.

Medida prátika sira ne’ebé benefisia tuir monitorizasaun, atensaun no akompanhamentu nafatin, introdús liuhosi realizasaun regulár peskiza nian sira hodi rekolla dadus no atualiza konhesimentu sira, kona-ba Ai-han no Nutrisaun, iha Relatóriu Finál Peskiza nian tinan 2020.

“Rezultadu Finál Peskiza nian kona Ai-han no Nutrisaun tinan 2020, ne’ebé ohin ita aprezenta hatudu empeñu no dedikasaun konjunsaun esforsu sira ne’ebé reúne ona iha KONSSANTIL, maibé mós hatudu servisu boot ne’ebé iha ita oin ba dezenvolvimentu umanu hodi atinje, entre sira-seluk, to’o tinan 2030 objetivu ODS 2 hosi (Laiha Hamlaha).

Relatóriu ida ne’ebé destaka debilidade boot sira sistema nutrisaun nasionál nian, ho valór komparativu sira ne’ebé boot liu ein relasaun ho ita-nia viziñu sira iha Rejiaun Sudeste Aziátiku ka iha Pasífiku, ne’ebé verifika índise mellór sira ne’ebé kombate ba subnutrisaun infantil, nazizmu no rakitizmu.

“Ita fiar katak ho parseria sira ne’ebé estabelese ona ho lansamentu ba Planu Estratéjiku ne’ebé konkretiza iha setór saúde nian, bele fó pasu konkretu sira ba transformasaun sistema nutrisaun nasionál,” nia dehan.

Iha tinan 2019 aloka ona osan dolar amerikanu millaun $44 ba atividade sira nutrisaun nian. Iha tinan 2020 valór ne’e reforsa ona ho dolar Amérikanu Millaun $56 ne’ebé mai hosi fundu COVID-19. Tinan ida-ne’e, 2021 Governu aloka ona dolar amerikanu millaun $68, iha ámbitu ba pakote kekuperasaun nian no estímulu ba ekonomia.

“Iha tinan ida-ne’e ita aumenta filafali ho valór dolar amerikanu millaun $117, inklui atividade sira ba programa kona-ba Cesta Bázika, ne’ebé sei aumenta rezilénsia país nian no fó impulsu boot ba esforsu sira ne’e hodi kria futuru ne’ebé di’ak ba Timoroan sira. Ita kontinua investe tuir Planu Asaun Nasionál Multisetoriál (CNAP-NFS 2021), hodi atua iha kauza sira ne’ebé kondisiona progresu ba Seguransa Alimentár no Nutritiva, atu nune’e bele asesivel liután ba ema hotu, la husik ema ida iha kotuk,” nia hateten.

Nune’e reprezentante the United Nations International Children’s Emergency Fund (UNICEF), Bilal Durrani, hateten, nia parte kongratula Primeiru Ministru, nia lideransa hodi prioritiza nutrisaun materna no labarik sira nian, nu’udar prioridade prinsipál ba Governu.

“Ha’u mós agradese ba Ministra Saúde, ba ita-nia apoiu hodi lansa peskiza ai-han no nutrisaun, nomós Planu Estratejia Nasional Nutrisaun Setór Saúde ohin loron. Ho ita-nia nia lideransa, Ministériu Saúde hasa’e ona orsamentu ba nutrisaun dala 10 (ka pursentu atus sia) hosi dolar $200,000, sae ba miliaun $2 iha tinan tolu ikus,” nia hateten.

Nia parte mós hato’o atu agradese ba parseiru dezenvolvimentu prinsipál sira ne’ebé mak investe ona ba loron krítiku rihun ida dahuluk iha labarik sira-nia moris, espesialmente Uniaun Europeia no Governu Japaun, ne’ebé kontribui ona ba redusaun ra’es-badak pursentu 11 iha tinan sanulu nia-laran.

Lansamentu Planu Estratejia Nasional Nutrisaun Setór Saúde nian ohin loron, nu’udar pasu importante atu redús má nutrisaun iha Timor-Leste.

Iha fatin hanesan, Embaixadór Uniaun Europeia iha Timor-Leste, Andrew Jacobs hateten, lansamentu rezultadu finál hosi peskiza ai-han no nutrisaun tinan 2020 no planu estratéjia nasionál nutrisaun setór saúde tinan 2022-2026 ne’e hetan mós apoiu orsamentu hosi Uniaun Europeia liuhosi nia projetu aselera hadi’a nutrisaun iha Timor-Leste liuhosi Ministériu Saúde hamutuk milliaun $11.

Jornalista : Arminda Fonseca

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here