Emprezáriu lokál Baucau partisipa sosializasaun asesu fundu rekuperasaun ekonómika iha área turismu hosi MTKI iha Vila Nova. Imajen Tatoli/Natalino Belo.

BAUCAU, 05 maiu 2022 (TATOLI) – Governu liuhosi Ministériu Turismu, Komérsiu no Indústria (MTCI) kinta ne’e, habelar informasaun mikro-pekena ba emprezáriu Baucau kona-ba asesu fundu rekuperasaun ekonómika iha área turismu nian.

Xefe Departamentu Apoia Emprezariál Jestaun Nasionál Empreendedorizmu Atividade Turístiku iha MTCI, Abílio Napoleão da Cruz, esplika fundu refere sei apoia ba grupu juventude kriativu ka artezenatu no empreza negósiu turizmu no ospitalidade.

“Planu rekuperasaun ekonómika nian ba empreza sira-ne’ebé hala’o atividade iha área turismu nian,” Abílio Napoleão da Cruz hateten iha Vila Nova, kinta ne’e.

Objetivu hosi programa refere atu emprezáriu sira asesu ba fundu rekuperasaun ekonómika ne’ebé afeta ba atividade negósiu durante tinan-rua tanba surtu Covid-19 no kalamidade 4 abríl 2021.

Kritéria importante ne’ebé presiza prienxe mak hanesan emprezáriu mikro-pequena no médiu empreza, hanesan timor-oan, tenke iha kartaun identidade, iha proposta no planu negósiu, akomodasaun turístiku komunitáriu, jéneru, defisiente, foin sae no universitáriu ne’ebé iha kreatividade, talentu no iha ideia inovativu atu hahú sira-nia negósiu.

Prioridade ba komunidade grupu ka individu ne’ebé iha talentu no kreatividade maibé seidauk hetan apoia ruma hosi governu, iha ona fatin ba atividade inisiál, viável ba negósiu no laiha disputa rai, aneksa mós dokumentu komprovativu rai nian.

Nune’e mós iha ona atividade negósiu mínimu tinan rua, iha traballadór mínimu na’in-neen, iha fatin atividade negósiu ne’ebé viável, seguru no prioridade ba empreza ne’ebé iha potensialidade merkadu hodi dezenvolve sira-nia negósiu.

“Importante liu mak bainhira aplika ba fundu ne’e tenke kumpri rekizitus hirak-ne’e,” Abílio akresenta.

Emprezáriu lókal atúal Prezidente Kámara Komérsiu no Indústria Timor-Leste (CCI-TL, sigla portugés), Estanislau Maria Quintas da Costa sente kontenti ho polítika VIII governu kona-ba rekuperasaun ekononómika liuliu iha área turismu nian.

“Ida-ne’e bele ajuda ona ita-nia empreza sira hodi hadi’a fali negósiu ne’ebé durante ne’e paradu,” nia katak.

Governu liuhosi MTCI aloka totál orsamentu ba planu rekuperasaun ekononómika millaun $5 ne’ebé aloka ba turismu hamutuk millaun $2,5 no tuir planu sei aloka ba kada emprezáriu másimu $ 50.000 no mínimu $ 5.000.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here