Esutudante UNTL Fakuladae Saùde Departamentu Parteira komemora loron internasionál parteira 2022 progresu ba tinan 100. Iha salaun Sentru Konvensaun Dili, kinta (05/05). Imajen Tatoli/Francisco Sony

DILI, 05 maiu 2022 (TATOLI)— Ministra Saúde, Odete Maria Freitas Belo, enkoraja parteira sira ne’ebé hala’o serbisu iha sentru saúde iha territóriu nasionál atu mellora atendimentu ho kualidade ba inan no oan hodi hamenus kazu mortalidade iha Timor-Leste.  

“Ha’u husu ba parteira sira iha Timor-Leste tomak atu serbisu ho di’ak, nune’e fó atendimentu ba inan no oan sira ho masimu liután hodi redus mortalidade inan no oan,” Ministra Saúde ne’e iha Sentru Kovensaun Dili (CCD), kinta ne’e.

Notísia relevante:  Kazu Mortalidade Inan no Labarik Kontinua Aas iha TL

Reprezentante Organizasaun Mundiál Saúde (OMS) iha Timor-Leste, Arvind Mathur no Ministra Saúde, Odete Maria Freitas Belo, halo lansamentu ba dokumentu Trantornu Ipertensaun Ina Isin-Rua. Iha salaun Sentru Konvensaun Dili, kinta (05/05). Imajen Tatoli/Francisco Sony

Governante ne’e hato’o kestaun ne’e iha ámbitu komemorasaun loron internasionál parteira mundiál tinan 100 ne’ebé realiza hosi Ministériu Saúde liuhosi Asosiasaun Parteira iha Timor-Leste (APTL) no Universiade Nasionál Timor-Leste.

Biban ne’e, Ministra Saúde enkoraja estudante kandidatu parteira sira atu estuda materia no atu estuda mós parteira seniór sira-nia atetude, nune’e ida ne’ebé mak di’ak bele la’o tuir no ida ne’ebé mak la-di’ak tau ba kotuk.

“Ha’u enkoraza ita-boot sira atu estuda, labele hanoin parteira maibé estuda atu bele sai ema profisionál. Estuda la’os atu matenek de’it no dekor de’it maibé estuda mós oinsá atu simu ema. Tanba hosi oan sira ne’ebé mak moris no dalaruma ita hatete katak ita-nia númeru labarik sira moris iha Timor mós aas,” Governante ne’e enkoraja.

Nune’e, Ministra Saúde mós nu’udar profisionál saúde kongratula ba parteira sira hotu iha Timor-Leste ne’ebé festeza hodi selebra loron Internasionál Parteira ba tinan 100.

Prezidente Asosiasaun Parteira Timor-Leste (APTL), Lidia Gomes. Imajen Tatoli/Francisco Sony

Iha biban hanesan, Prezidente Asosiasaun Parteira iha Timor Leste (APTL), Ligia Gomes, informa parteira sira ne’ebé durante hala’o servisu iha fasilidade saúde iha territóriu nasionál hanesan HNGV hamutuk 822.

Estrátejia Ministériu Saúde too iha 2030 katak sei koloka parteira na’in-rua, Enfermeiru na’in-rua, Médiku ida no tékniku aliadu sira ba iha suku hodi atendimentu ba komunidade sira iha área refere.

“Dezafiu sira ne’e koloka parteira la tuir sira-nia munisípiu, maibé ba fali munisípiu seluk no tratamentu la dignu no seguransa ne’ebé la seguru ba parteira sira. Tanba parteira sira mesak feto de’it entaun seguransa importante loos ba sira atu fó atendimentu ba inan no oan iha área remota,” nia afirma.

Tuir sensus 2016 katak mortalidade inan no oan 550 /100 mil, liuliu inan sira ne’ebé mak mate tanba isin rua agora tun ona ba 218/100 mil signifika redús.

“Maske, iha reduasaun, maibé kompara ho nasaun iha ASIA pasifika ne’e sei aas. Nune’e presiza investe makas atu parteira sira bele iha kualidade atendimentu ba inan no oan liuliu tuir  formasaun másimu hodi eleva  sira-nia  kapasidade ne’ebé mak di’ak liután,” nia akresenta.

Entretantu, Reprezentante   Organizasaun Mundiál Saúde (OMS), Arvind Mathur, informa ohin loron kuaze instituisaun saúde hotu hosi ospitál ba postu saúde sira iha ona parteira atu fó atendimentu saúde ba inan no labarik sira.

Notísia relevante:  Kazu mortalidade inan no oan iha HNGV menus

Jornalista : Felicidade Ximenes

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here