Ministru Edukusan Joventude no Desportu (MEJD), Armindo Maia. Imajen Tatoli/Francisco Sony

DILI, 05 maiu 2022 (TATOLI) – Ministru Edukasaun Juventude no Desportu (MEJD), Armindo Maia dehan, profesór barak ne’ebé hanorin iha eskola Públiku sira iha territóriu nasionál to’o agora seidauk koalia no halo komunikasaun ne’ebé diak iha lingua Portugeza  ba estudante sira iha aula laran.

“Lo’os duni, ha’u nu’udar Ministru Edukasaun iha Primeiru Governu konsege hatama ona lingua portugeza ne’e ba   kurríkulu Timor-Leste nian nu’udar primeiru lingua instrusaun. Maibé depois mosu fali mudansa hatama tan tetun ho Portugiz. Ida ne’e maka dezenvolvimentu. Maibé to’o agora ita hotu hatene katak kapasidade profesór sira nian atu halo komunikasaun ho espresaun hodi hanorin ho lingua portugeza sei limitadu,” dehan Ministru MEJD, Armindo Maia iha ninia kna’ar fatin MEJD Vila Verde, kinta ne’e.

Ministru Armindo haktuir katak iha opsaun rua atu halo maka, buka hadi’a difikuldade sira ne’ebé iha, liu-liu kona ba hasa’e kapasidade profesór sira nian oinsá atu bele halo komunikasaun ho lingua portugeza ba alunu sira iha aula laran no mós buka atu halo estudu viabilidade ba eskola.

“Ita atu halo estudu viabilidade hodi  bele realiza formasaun ba profesór sira. Maibé intensaun loloos ne’e hakarak harii eskola ida iha nivel ensinu superiór edukasaun hanesan fakuldade direitu  hodi reforsa lingua Portugeza ba profesór sira atu garantia kualidade no abilidade profesór sira nian iha future,” Nia haktuir.

Membru governu ne’e afirma katak formasaun ne’ebé durante ne’e realiza iha INFORDEPE ho kategoria formasaun ezersísiu de’it. Agora dadaun formadór sira hahú hanorin daudaun ona depois sei reforsa liu tan planu sira ne’ebé maka MEJD hakarak atinje iha ninia mandatu sira.  Tanba ne’e,  planu MEJD  sei tau ho sériu no rigor hodi halo buat foun.

Tuir nia katak, MEJD iha planu atu iha fakuldade direitu ida hanesan iha Universidade Nasional Timor-Leste (UNTL) ne’e atu bainhira profesór sira ne’ebé maka hetan oportunidade estuda iha fakuldade ne’e ho kualidade duni.

Jornalista: Tomé Amado    

Editóra    : Armandina Moniz

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here