Pesoál Apoiu Administrasaun Suku (PAAS) iha munisípiu Bobonaro partisipa hela formasaun ne'ebe oferese hosi Diresaun Jerál Estatístika, Ministeriu Finansa. Imajen Tatoli/Sérgio da Cruz.

BOBONARO, 05 maiu 2022 (TATOLI)-Ministériu Finansa liuhosi Diresaun Jerál Estatístika (DGE, sigla portugés), kinta realiza formsaaun no kapasitasaun ba Pesoál Apoiu Administrasaun Suku (PAAS) sira iha munisípiu Bobonaro kona-bá rejistu sivíl estatistika vitál atubele hatene dadus loloos populasaun iha Timor-Leste.

Diretór Nasionál Metodolojia Rekolla dadus iha DGE, Ricardo da Cruz Santos, esplika formasaun ne’e ho objetivu atu hasa’e koñesimentu PAAS kona-bá prienximentu formatu suku oinsá bele fornese dadus kona-ba indikadór ba ema moris, mate no ema  tama-sai.

Nia haktuir, atividade ne’e implementa dezde iha inísiu 2014, maibé laiha kontinuidade tanba iha 2016 iha mudansa troka xefe suku no PAAS iha territóriu Nasionál inklui impase politika iha 2017 no pandemia Covid-19 ekipa sira la konsege tún ba terrenu.

“Ami foin realiza fali iha tinan ne’e tanba haree katak Pesoál Apoiu Administrasaun suku sira barak mak foun, entaun ita fó formasaun oinsá bele prienxe formatu ne’e ho didi’ak, depois haruka ba ami, hodi ita bele hatene tinan ida-ne’e ema moris na’in hira, mate hira no tama-sai na’in hira,” nia informa ba Tatoli, iha edifísiu Diresaun Servisu Estatístika Muinisípiu Bobonaro.

Diretór ne’e akresenta dadaun ne’e DGE servisu hamutuk ho liña ministériu sira hanesan, Ministériu Saúde (MS), Ministériu Administrasaun Estatál (MAE) no Ministériu Justisa (MJ) rekolla hela dadus populasaun iha territóriu nasionál.

Maibé tuir dekretu-lei númeru 17/2003 fó kompeténsia tomak ba Diresaun Jerál Estatístika iha baze legál atu halo sensu uma-kain no peskiza dadus nasaun nian.

“Entaun ema moris iha ospitál ka suku tenke ba rejistu no mate mós tenke ba hatama iha rejistu sivíl, atu ita bele analiza no ikus dadus sira-ne’e ita armoniza no halo sinkronizasaun ho liña ministériu sira-ne’ebé serbisu interligadu atu ikus dadus ne’e bele sai iha odamatan ida de’it, ami mak públika bazea ba baze legál sira-ne’ebé fó mai ami,” nia tenik.

Atividade ne’e durante loron tolu ne’e hetan partisipasaun másimu hosi Pesoal Apoiu Administrasaun Suku, iha munisípiu Bobonaro hamutuk 50 mai hosi postu administrativu Atabae na’in-haat, Balibo neen, Maliana hitu, Cailaco ualu, Bobonaro 18 no Lolotoe na’in-hitu.

Formasaun ne’e parte DGE implementa faze daruak, faze dahuluk implementa iha leste iha munisípiu Manatuto, Baucau, Viquque no Lopalos, Aileu ho Manufahi konklui ona iha semana kotuk, no faze daruak nian iha munisípiu Ermera, Liquiçá, Bobonaro, Covalima no Rejiaun Administrativa Espesiál Oe-Cuse Ambeno (RAEOA).

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here