Plenaria Parlamentu Nasional. Imajen Tatoli Antonio Goncalves.

DILI, 05 maiu 2022 (TATOLI)—Organizasaun Naun Govermentál (ONG) La’o Hamutuk preokupa ho Governu no Parlamentu Nasionál (PN) debate orsamentu retifikativu ho karáter urjénsia, tanba programa sira-ne’ebé Governu propoin la’ós urjente.

“La’o Hamutuk preokupa ho proposta ne’ebé Governu propoin hodi foti desizaun ne’ebé sei fó impaktu boot ba sustentabilidade finansa Estadu, ho maneira ne’ebé ansi demais no la mai ho urjénsia klaru. Tanba, La’o Hamutuk la haree razaun forte atu justifika pedidu urjénsia ne’ebé Parlamentu Nasionál aprova tiha ona,” refere nota imprensa ne’ebé Aência Tatoli asesu, kinta ne’e.

Maske Governu deskreve katak orsamentu retifikativu ida-ne’e presiza atu responde ba situasaun urjente, realidade mak programa sira-ne’ebé Governu propoin la’ós urjente tanba apoiu ba ema vulneravel hetan parte ki’ik de’it hosi proposta ida-ne’e.

Tanba, tuir proposta ne’e, ema ki’ak sei hetan de’it 8% hosi transferénsia foun ne’e liuhosi programa subsídiu ba kada uma kain, programa UKL Plus no edukasaun hetan 1%. Maioria (89%) hosi proposta ida-ne’e sei fó ba Fundu Kombantente Libertasaun Nasionál.

Se Governu haree iha duni urjénsia atu realiza programa foun hosi proposta ne’e, iha dalan ne’ebé eziste ona ba Governu atu uza osan hosi OJE 2022 aprovadu.

Lei enkuadramentu orsamentál loke dalan ba Governu, atu muda alokasaun balun lah kria orsamentu retifikativu, aleinde ne’e Fundu Kontinjénsia iha OJE 2022 aprovadu hetan ona alokasaun tokon $29.5; fundu ida ne’e sufisiente, atu selu ba maioria hosi programa foun ne’ebé Governu propoin Fundu Kombantente Libertasaun Nasionál de’it nu’udár transferénsia eskala boot ne’ebé presiza hetan transferénsia foun.

“Ami preokupa katak proposta ne’e bele hamosu tendénsia perigozu katak prosesu OJE ne’ebé estabelese iha Lei Enkuadramentu Orsamentál bele ignora, se bainhira iha motivasaun polítika. Tanba, tuir rezultadu hosi eleisaun Prezidensiál liu ba Ramos Horta sei hala’o funsaun nu’udár Prezidente Repúblika foun ba Timor-Leste, hafoin toma pose iha 20 Maiu 2022. Rezultadu eleisaun labele sai razaun ba Governu, atu fó presaun ba PN atu pasa lejizlasaun no hetan promulgasaun hosi Prezidente Repúblika atuál ho maneira lalais ne’ebé laiha oportunidade atu diskute ho kle’an,” nota ne’e hateten.

Kona-ba Fundu Kombantente Libertasaun Nasionál, La’o Hamutuk haree katak informasaun ne’ebé Governu fahe la kompletu.

“Ami preokupa katak Governu propoin atu kria ho lalais fundu foun ida-ne’e, lahó detallu kona-ba jestaun fundu refere. Tanba, seida’uk iha dekretu-lei ne’ebé jere fundu ne’e no tuir Governu nia planu legislativu 2022 seida’uk iha planu atu kria rejime legál durante tinan ne’e. Nune’e, kriasaun Fundu Kombantente Libertasaun Nasionál la’ós urjente no ami konsidera, katak mudansa ba mekanizmu atu fó apoiu ba veteranu sira no estrutura OJE no finansa Estadu ba futuru di’akliu, bele diskute ho kle’an tan. Se bainhira Parlamentu hala’o debate kona-ba proposta ida-ne’e ho karáter urjénsia, laiha tempu sufisiente atu konsidera ho kle’an impaktu ruma,” nota ne’e hhaktuir.

Bazea ba preokupasaun sira iha leten, La’o Hamurtuk nia submisaun mak La’o Hamutuk sujere atu Parlamentu Nasionál atu la aprova proposta Orsamentu Retifikativu.

“Nune’e, ami hein katak hafoin Parlamentu rejeita proposta orsamentu retifikativu, Governu no Parlamentu bele diskute no deside, se Timor-Leste presiza lejizlasaun foun atu fasilita apoiu efetivu ba grupu vulneravel sira,” komunikadu ne’e dehan.

Tuir komunikadu imprensa ne’ebé Agéncia Tatoli asesu ne’e haktuir, katak iha 04 fulan-maiu 2022, La’o Hamutuk submete karta aberta ba Komisaun C no Deputadu/a hotu iha Parlamentu Nasionál kona-ba proposta orsamentu retifikativu ba Lei Orsamentu Jerál Estadu 2022.

Maske, Governu la loke oportunidade ba Sosiedade Sívil atu submete submisaun ba proposta ne’e, La’o Hamutuk konsidera importante atu hato’o preokupasaun ho proposta refere hodi bele ajuda deputadu/a sira atu halo desizaun di’akliu, bele haree submisaun sira hanesan tuir mai.

Iha loron 26 abríl, Konsellu Ministru deside husu Parlamentu Nasionál atu aumenta OJE 2022 promulga ona ho despeza foun ba billaun $1,13 hodi finansia medida balun, inklui kriasaun Fundu Kombatente Libertasaun Nasionál (FCLN) ho valór $1 bilaun.

Prosesu atu diskute proposta ida-ne’e ho tempu limitadu tebes, tanba hafoin pedidu hosi Governu atu aprova ho lalais, iha loron 29 abríl, Parlamentu Nasionál deside atu halo debate kona-ba proposta ida-ne’e ho karáter urjénsia.

Governu justifika pedidu ida-ne’e ho razaun katak, medida ne’ebé propoin iha orsamentu retifikativu presiza kedas atu responde ba situasaun ekonómiku atuál. Rezultadu katak, Komisaun sira sei halo audiénsia públika durante loron 03-05 maiu no debate iha plenária Parlamentár iha 09-13 fulan-maiu.

Bainhira hetan aprovasaun, OJE 2022 retifika sei sa’e liu biliaun $3,2 no montante ne’e boot liu iha istória Timor-Leste nia polítika orsamentál. Orsamentu 2022, hetan finansia ho transferénsia biliaun $2,4 hosi Fundu Petrolíferu, liu dala haat Rendimentu Sustentável Estimadu.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here