Prezidente Komisaun Funsaun Públika (KFP), Faustino Cardoso Gomes. Imajen Tatoli/Francisco Sony.

DILI, 05 maiu 2022 (TATOLI)–Prezidente Komisaun Funsaun Públika (CFP-sigla portugés), Faustino Cardoso, hateten funsaun públika hatuur ona asuntu inkluzaun nu’udar prioridade polítika atu asegura Ema ho Defisiénsia (EhD) nia partisipasaun ativa iha dezenvolvimentu nasionál.

“Atu asegura Ema ho Defisiénsia sira-nia partisipasaun ativa, mak Komisaun Funsaun Públika hatuur ona asuntu inkluzaun nu’udar prioridade polítika aas ida, aleinde prioridade sira seluk iha ámbitu reforma Administrasaun Públika Timor-Leste,” Prezidente KFP ne’e hateten ba jornalista sira, hafoin partisipa diskusaun meza redonda relasiona ho peskiza ba rezultadu iha administrasaun públika, iha Maubara Room, kinta ne’e.

Prioridade ida-ne’e iha Planu Estratéjiku Komisaun Funsaun Públika (PE-CFP) nian ba tinan 2015-2030, espesifikamente iha Estratéjia 13.3 ne’ebé hateten “Promover as oportunidades de asesu Função Pública, das pessoas com deficiências.

Estratéjia ida-ne’e ho objetivu espesífiku atu kria oportunidade, igualiedade iha forsa traballu no asesu iha Funsaun Públika ho baze ba diversidade no inkluzaun Ema ho Defisiénsia (EhD) sira.

“Objetivu hosi meza redonda ne’e mak atu fasilita no apoiu hosi DFAT Governu Austrália, nune’e partilla informasaun no peskiza ida-ne’e KFP hamutuk ho Governance for Development (GFD) buka atu konsulta kle’an liután ba asuntu sira refere ho entidade sira, asosiasaun ema ho defiensia relasiona ho validasaun rezultadu peskiza kona-ba funsionáriu ho defisiénsia iha instituisaun Administrasaun Públika,” nia dehan.

Ida-ne’e, tuir nia, atu kompleta no reforsa informasaun sira-ne’ebé rekolla ona liu-hosi diskusaun, foku ba grupu hosi munisípiu 13 no prioritiza asaun sira ba rekomendasaun hirak ne’ebé identifikadu hosi peskiza kona-ba EhD iha Administrasaun Públika.

Avaliasaun refere realiza iha 2019 iha munisípiu 13 hodi involve funsionáriu hamutuk na’in-166, ne’ebé kompostu hosi feto hamutuk na’in-44 no mane na’in-122, no funsionáriu ho defisiénsia ema na’in-44 husi totál respondente.

Husu kona-ba involvimentu ema ho defisiénsia iha kargu xefia no diretór iha funsaun públika, Prezidente KFP hateten sei iha lakuna ne’ebé mak presiza hadi’a.

“Ita ho onestu, ho momoos no rekoñese katak ita-nia kuadru legál sira-ne’e sei iha nia lakuna balun ne’ebé ita presiza hadi’a,” nia dehan.

Atu hadi’a ne’e presiza prosesu ida, prosesu unilaterál hosi KFP maibé tenke iha servisu ekipa ida hanesan diskusaun meza redonda, aumezmu tempu no iha vontade mós hosi nível altu sira iha kompromisu polítika ida mak buat ne’ebé KFP hanoin ne’e, bele hetan aprova no favorável, nune’e ikus bele implementa tuir.

“Bainhira ita ko’alia kona-ba lei no lei iha nia prosedimentu, la’ós KFP mak halo no hasai lei. Maibé, karik hosi Governu no hosi Parlamentu Nasionál kala ko’alia kona-ba lei. Karik, ezije iha alterasaun lei, ne’e kompeténsia hosi Parlamentu Nasionál nian,” nia esplika.

Prezidente KFP hateten, karik iha alterasaun dekretu-lei ka hamosu dekretu-lei ne’e kompeténsia Governu nian.

Funsaun Públika rekoñese ninia papél importante hodi aborda iha polítika no programa asuntu EhD atu asegura sira-nia kontribuisaun no partisipasaun ativa iha dezenvolvimentu Estadu no nasaun Timor-Leste.

Enkuantu, Ema ho Defesiénsia no daudaun ne’e servisu iha Ministériu Administrasaun Sosiál no Inkluzaun (MSSI), Domingos Henrique, hateten Ema ho Defisiénsia preokupa mós ba rekrutamentu ba funsionáriu tanba kestaun kritériu katak ema tenke ho saúde di’ak.

“Tanbe ne’e, ami ema ho defisiénsia preokupa tebes ho prosesu rekruamentu ne’ebé iha,” nia preokupa.

Aleinde ne’e, nia mós kestiona kona-ba infraestrutura tanba laiha asesibilidade ba Ema ho Defisiénsia hanesan ministéiru sira-ne’ebé mak halo edifísiu ho andar.

“Ida-ne’e sai difikuldade boot ba ami EhD bainhira trata dokumentu ruma, tanba ami servisu iha administrasaun nian enatun tenke la’o. Maibé, realidade ne’ebé mak iha hanesan ha’u-nia servisu fatin MSSI no KFP nian,” nia dehan.

Iha diskusaun ne’e konvida entidade no asosiasaun Ema ho Defisiensia sira hanesan ADTL, RHTO, UN WOMEN, REDE FETO, ADMTL no liña ministériál sira, ONG’s hodi rona ideia sira hodi akumula no sai hanesan prioridade polítika ida ba KFP hodi bele implementa iha instituisaun Estadu hotu.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here