Komisaun Organizadora ba eventu SEA Games simu Jogadór selesaun nasionál U-23 Timor-Leste, bainhira hosi Malázia too iha aeroportu Vietname. Imajen/espesiál

VIETNAME, 05 maiu 2022 (TATOLI)— Hafoin treinu no jogu amigavél iha Malázia, ekipa selesaun nasional U-23 Timor-Leste, bá  fali Vietname hodi prepara-an atu partisipa eventu internasionál SEA Games ne’ebé sei realiza iha fulan ne’e.

Ekipa Selesaun nasionál kompostu hosi jogadór na’in-17 no ofisial na’in hitu inklui jornalista hosi Agência TATOLI. Institutu Públiku (TATOLI, I.P), sai hosi Malázia iha loron kuarta (04/5) ho aviaun Air Asia iha tuku 12:40 no too iha Aeroportu Internasionál Hanoi Vietname iha tuku 16:00, lokoraik.

Notísia relevante:  Jogu amigável-TL hamoe Malazia iha nia uma rasik

Bainhira ekipa too simu direitamente hosi Komisaun Organizadora SEA Games Vietname nian hodi transporta kedan ba fatin ne’ebé prepara ona ba atleta sira.

Kapitaun ekipa Filomeno Junior da Costa hateten, jogadór hotu too ho kondisaun ne’ebé di’ak no preparadu atu joga.

“Ami too ho kondisaun ne’ebé di’ak hotu, maske jogadór ho númeru limitadu maibé ami prontu joga hodi reprezenta Timor-Leste no hamorin nasaun nia-naran,” Kapitaun selesaun Nasionál U-23, Filomeno Juniór, hateten  ba Agência TATOLI iha aeroportu internasional Vietname, kinta ne’e.

Enkuantu jogadoór na’in-lima no ofisial na’in-ida mak daudaun ne’e sei iha Malázia labele mai Vietname tanba detetadu pozitivu Covid-19.

Notísia relevante:  Durante iha Malazia jogadór sira konsumu ai-han nutritivu

Iha biban hanesan, Médiku Jerál iha Hospitál Nasionál Guido Valadarese, Eldegar Lopes Martins, hateten, ohin no aban kontinua halo teste PCR ba sira ho rezultadu negativu ona mak sei tuir mai Vietname hodi partisipa kompetisaun internasionál ne’e.

“Tuir Lei Malázia nian hafoin teste pozitivu sei hela iha kuartu ou izola durante loron 4, hafoin re-teste fali no negativu mak sira foin viájen mai tuir Vietname,” esplika médiku Eldegar ne’ebé akompaña Jogadór Timor-Leste ne’e.

Tuir oráriu aban (06/05) iha Estádiu Nasionál Vietname ekipa Timor-Leste sei kontra Filipina iha tuku 16:00, lokoraik oras Vietame nian.

Nune’e, iha loron 08 maiu, ekipa Timor-Leste kontra Myanmar iha Estádiu Vietname tuku 16:00, lokoraik.

Nune’e, iha loron 10 maiu, ekipa lafaek kontra Indonézia iha Estádiu Vietname iha tuku 19:00 no ikusliu iha 15 maiu hasoru uma-na’in Vietname iha fatin ne’ebé hanesan iha tuku 19:00.

Notísia relevante:  Malazia-Embaxadora vizita jogadór U-23 ho apoiu morál atu iha espiritu desportivu

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here