Ekipa verifikasaun dadus kandidatu veteranu. Imajen Tatoli/Celestina Teles.

COVALIMA, 05 maiu 2022 (TATOLI)—Prezidente Ekipa Komisaun Verifikasaun, Francisco Doutel Sarmento “Lamesak”, hateten Governu liuhosi ekipa komisaun verifikasaun provizóriu verifika ona dadus kandidatu veteranu hamutuk na’in-139 iha suku Belekasak, postu administrativu Maucatar, munisípiu Covalima.

“Ami halo enkontru ho Ministru Asuntu Kombatente Libertasaun Nasionál, Julio Sarmento “Meta Malik”, orienta ba ekipa atu halo verifikasaun dadus kandidatu veteran ne’e hahú iha segunda (02/05) nune’e iha suku Belekasak, postu administrativu Maucatar, munisípiu Covalima hahú verfika iha tersa (3/5) to’o segunda (16/05), dadus provizóriu, ekipa verfika ona kandidatu veteranu   hamutuk na’in-139,” Francisco Doutel Sarmento “Lamesak” hato’o ba jornalista sira iha suku Belekasak, kinta ne’e.

Komisaun halo verifikasaun dadus kandidatu veteranu sira-ne’ebé hahú rejista iha 2009, maibé ba kandidatu veteranu ne’ebé mak hahú rejistu iha tinan 2003 no 2005 ne’e liu ona, nune’e ekipa komisaun verifikasaun dadus kandidatu veteranu bazea ba kalendáriu ne’ebé mak aprova ona no iha munisípiu Covalima sei finaliza iha domingu, 29 fulan-jullu tinan 2022.

Tuir oráriu hafoin finaliza verifikasaun iha suku Belekasak, sei ba iha suku Matai ne’ebé pertense ba postu administrativu Maucatar no kontinua suku Beco, Labarai, Camanasa, Suai Loro no ikus iha Suku Debos ne’ebé pertense ba postu administrativu Suai Vila.

Antes ne’e, ekipa komisaun verifikasaun dadus veteranu finaliza ona halo verifikasaun, iha postu administrativu sira hanesan Fatumea, Fatululik, Fohorem, Tilomar no Zumalai, nune’e ekipa finaliza ona halo verfikasaun dadus kandidatu veteranu hamutuk na’in-9,963 ne’ebé atinji ona 48%.

Tuir Agência Tatoli nia observasaun iha terrenu, hatudu katak durante ekipa verfikasaun hala’o verfikasaun dadus kandidatu veteranu iha suku Belekasak ne’e, hetan seguransa másimu hosi Polísia Nasionál Timor-Leste (PNTL).

Jornalista : Celestina Teles

Editór    :  Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here