Imajen Tatoli/Osória Marques.

DILI, 05 maiu 2022 (TATOLI)—Governu liuhosi Ministériu Saúde (MS) hamutuk ho Ajénsia Estadu Unidu ba Dezenvolvimentu Internasionál (USAID, sigla inglés)) iha Timor-Leste no Sosiedade Sivíl, kinta ne’e, lansa ona Rede Ba Saúde Timor-Leste (REBAS-TL) iha Maubara Room, Dili.

Vise-Ministru Saúde (MD), Bonifacio dos Reis “Maucoli”, hateten ho ezisténsia REBAS-TL nian bele halo advokasia, tanba liuhosi advokasia ne’e bele hasa’e di’ak liután sira-nia koñesimentu nune’e bele partisipa di’ak liután iha sa’úde nian.

“Lansamentu ofisiál Rede ba Saúde-TL ne’e importante tebes tanba Forum Organizasaun Naun Governamentál Timor-Leste (FONGTIL) nu’udar parseiru ne’ebé mak forte tebes ba Ministériu Ssaúde atu bele hala’o ho sistema ida-ne’e no bele ajuda MS atu halo kooperasaun no koordensaun nomós oinsá halo advokasia,” Maucoli hateten ba jornalista sira hafoin partisipa lansamentu REBAS-TL.

REBAS-TL ne’ebé envolvimentu ho Governu hodi asegura servisu saúde ne’ebé inkluzivu, justu, no ho kualidade, servisu hamutuk atu haforsa seguransa saúde no hadi’a komunidade nia bem-estár iha servisu saúde no bem-estár, no rede foun ne’e estabelese atu eleva sosiedade sivil sira-nia serbisu.

Governante ne’e dehan, futuru MS sei kontinua halo komunikasuan no koordenasaun atu nune’e bele atinje Planu Estratéjiku Dezenvolvimentu Nasionál (PEDN) iha setór saúde nian 2011-2030 tenke atinje ona povu Timor-Leste saudável.

“Ba ida-ne’e ita hasa’e kualidade liu-liu ba prestasaun saúde kualidade primária liu-liu área remota sira katak ita-nia objetivu PEDN ne’e sei la husik ema ida iha kotuk no ema hotu atendimentu ne’ebé mak hanesan no ho kualidade,” nia dehan.

Maibé, aleinde ne’e sei kria rekursu ida liu-liu rekursu umanu no infraestrutura atu oinsá hasa’e kapasidade pesoál saúde sira no prestasaun saúde ne’ebé di’akliu ba povu nia saúde.

Enkarregadu Estadu Unidus Amérika iha Timor-Leste, Tom Daley, hateten Ajénsia Estadu Unidu ba Dezenvolvimentu Internasionál (USAID) iha Timor-Leste fó apoiu finanseiru millaun $15.6 ne’ebé fornese liuhosi USAID nia Atividade ba Sustentabilidade Sistema Saúde.

“Ha’u hakarak fó parabens ba membru REBAS-TL ne’ebé mai hamutuk hodi estabelese rede advokasia no ami orgullu bele apoiu ONG lokál sira atu halo advokasia hodi atinje prestasaun saúde ida-ne ‘ebé diak liu ba timor-oan hotu. Estadu Unidu Amerika sei kontinua atu hamriik ho Timor-Leste nu’udár belun no parseiru iha territóriu tomak,” Enkarregadu Estadu Unidus Amérika iha Timor-Leste ne’e hateten.

Governu Amérika nia misaun iha Timor-Leste, liuhosi USAID kontribui fundu millaun $92 hahú tinan 2021 to’o 2025 hodi haforsa ekonómia no boa-governasaun iha Timor-Leste.

Dezde Timor-Leste nia independénsia, Estadu Unidu Amérika kontribui ona liu millun $250 hodi apoiu dezenvolvimentu ida ne’ebé inkluzivu no hakmatek, ba Timor-Leste ida ne’ebé prósperu, saudável no auto-sufisiente.

Diretora Ezekutiva Fórum Organizasaun Naun Governamentál (FONGTIL), Elisabeth Lino de Araújo, hateten MS tenke halo koordenasaun ho REBAS-TL atu saida mak REBAS-TL hetan ona iha terrenu bele fó rekomendasaun espesífiku ba MS hodi bele hadi’a.

“Ho REBAS-TL nia ezistensia atu bele halo di’ak liután públiku hanesan sistema saúde ita haree seidauk iha adekuadu tanba ne’e ho REBAS-TL nia prezensa atu bele hadi’a lamentasaun públiku nian ne’ebé mak kontinua halerik,” nia dehan.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here