Estensionista Oé-Cusse konsege kolleta ai-farina tonelada 100,45 iha sentru agrikultura Aenmat. Imajen mídia estensaun.

OÉ-CUSSE, 05 maiu 2022 (TATOLI) – Ekipa tékniku estensionista iha Diresaun Rejionál Agrikultura, Rejiaun Administrativa Espesiál Oé-Cusse Ambeno (RAEOA), konsege kolleta ai-farina hamutuk tonelada 100,45 ba ekatre ida iha sentru agrikultura Aenmat, suku Lifau, sub-rejiaun Pante Makasar.

Xefe Departamentu Apoiu Servisu Estensaun iha Diresaun Rejionál Agrikultura Oé-Cusse, Amaro Efi, esplika, dadus ne’e sei provizóriu tanba mai hosi rezultadu formasaun no prátika kolleta ai-farina no fehuk midar ne’ebé fasilita hosi Ministériu Agrikultura no Peska (MAP), atu prepara halo kolleta ba tinan 2023.

“Formasaun ne’e kontinua halo prátika ba ai-farina de’it, ita konsege hetan tonelada100,45 ba ektare 1, maibé ne’e analiza liuhosi téknika la’os atu tetu hotu iha área crop-cuting ninian, ba fehuk midar seidauk halo tanba daudaun ita sei fokuliu ba ai-farina,” Amaro Efi, informa ba Agência Tatoli iha Oé-Cusse, kinta ne’e.

Iha loron 3 abríl Ministériu Agrikultura no Peska apoia formasaun ba ektensionista sira kona-ba crop-cutingg ba plantasaun ai-farina no fehuk midar, nune’e iha tinan oin bele halo crop-cuting ba plantasaun rua ne’e

Tuir nia, tanba haree ba desizaun autoridade no Estadu Timor-Leste, propoin plantasaun ai-farina ho fehuk midar, atu tama ba katogoria programa cesta bázika, tán ne’e maka foin daudaun ekipa nasionál hosi MAP fasilita formasaun ba estensionista kona-ba téknika kolleta nian.

Iha 2008 to’o 2009 ekipa ekstensionista konsege halo formasaun maibé liutiha laiha kontinuasaun ba kolleta tanba koñesimentu seidauk másimu, nune’e iha 2010 mai to’o leten hahú halo kolleta ba plantasaun batar no hare, no rezultadu hatudu no submete ba nasionál, maibé ba plantasaun rua ne’e iha tinan ne’e mak foin hahú halo formasaun preparasaun ba tinan oin.

“Ne’ebé ba tinan 2022 ne’e tuir dadus provizóriu ita atinje hela produsaun ba batar tonelada 6,687 ba área kultivu 5.678, área kolleta 5.430 ida-ne’e mak rezultadu finál maibé sei provizóriu tanba sei lori ba MAP mak halo analiza tiha mak foin públika nia rezultadu loloos kona-ba Oé-Cusse nian,” nia dehan.

Entretantu, estensionista destaka iha suku 18 iha territóriu Oé-Cusse hamutuk na’in-20, iha suku Bobometo, sub-rejiaun Oésilo ema na’in-rua (2), no suku Costa, sub-rejiaun Pante Makasar ema na’in-rua (2) tanba área luan.

Jornalista   : Abílio Elo Nini
Editor         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here