Pesoál Apoiu Administrasaun Suku (PAAS) iha munisípiu Bobonaro partisipa hela formasaun ne'ebe oferese hosi Diresaun Jerál Estatístika, Ministeriu Finansa. Imajen Tatoli/Sérgio da Cruz.

DILI, 05 maiu 2022 (TATOLI)-Diresaun Jerál Estatístika husi Ministériu Finansa (MF), kinta ne’e, realiza hikas treinamentu ka refreshing training ba Pesoál Apoiu Suku (PAS) oinsá atu kumpila dadus estatístika ida di’ak.

Diretór Jerál Estatístika, Élias dos Santos Ferreira. Imajen TATOLI/Egas Cristóvão

Diretór Jerál Estatístika, Elias dos Santos, hateten objetivu husi refreshing training kona-ba rejistu sivil no estatístika teste ne,e, hala’o ona iha munisípiu 12 inklui Rejiaun Administrativa Espesiál Oé-Cusse Ambeno (RAEOA), no iha semana kotuk realiza ona iha munisípiu parte leste nian, nune’e ohin loron 05 to’o 06 fulan-maiu  halo mós iha munisípiu seluk.

“Importánsia hosi dadus rejistu sivil no teste estatístika ne’e maka ita bele hatene ita-nia ema moris, mate no muda sai tanba ne’e liga liu ba movimentu populasaun iha territóriu Timór,” Elias dos Santos Ferreira, hateten iha edefísiu DGE, Caicoli.

Iha tinan hirak liubá, Diresaun Jerál Estatístika fó ona treinamentu kona-ba rejistu sivíl no teste estatístika, maibé oras ne’e tenke halo filafali treinamentu tanba pesoál apoiu suku balun foun.

Dadus kona-ba rejistu sivil no teste estatístika ne’e, Diresaun Jerál estatístika sei submete ba ezekutivu sira hodi tau iha programa governu nian.

“Durante ne’e DGE identifika problema barak tanba pesoál apoia suku balun iha área rurál, dala ruma ami ba dadus ne’e mai ladún regulár tanba ne’e maka dala barak ami-nia ekipa hosi munisípiu mak tenke ba foti dadus,”nia hateten.

Maibé dadaun ne’e PAS sira simu ona materiál eletrónika nune’e ba-oin DGE sei instala programa ne’e iha kumputadór idaidak depois sira rekolla dadus hodi  manda diretamente ba estatístika munisipál hodi kumpila hamutuk sai relatóriu ida.

Diresaun Jerál estatístika prevee ona orsamentu hamutuk $ 26.000 ba atividade refreshing training ba Pesoál Apoiu Suku (PAS).

Programa rejistu sivil no teste estatístika ne’e Diresaun Jerál estatístika servisu hamutuk ho Ministériu Administrasaun Estatál liuhosi lideransa komunitária sira iha nivél aldeia no suku tanba ne’e, husu ba pesoál apoiu suku sira atu hametin liña koordenasaun di’ak liu hodi fó susesu ba programa ne’e.

Iha fatin hanesan Prezidente Autoridade Munisípiu Dili, Guilhermina Filomena Saldanha Ribeiro, konsidera treinamentu ne’e importante tebes atu fasilita PAS sira hodi foti dadus populasaun nian ho di’ak liután.

“Reflesing training ne’e importante tebes atu mai filafali fó hanoin ba sira atu sira idaidak haree relatóriu ne’ebé sira hato’o ne’e, buat ne’ebé sira presiza hadi’a ho didi’ak liután nomós atu fó hanoin nafatin katak foti dadus estatístika ne’e oinsá tanba dadus ne’e importante tebtebes ho dadus ne’e bele fó ba governu nune’e governu hanoin saida mak sei halo ba komunidade,” nia hateten.

Enkuantu, Pesoál Apoia Suku munisípiu Dili hamutuk na’in-31, la inklui PAS Ataúro partisipa iha treinamentu ohin.

Jornalista : Antónia Gusmão.

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here