OÉ-CUSSE, 05 maiu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), tinan ne’e fornese fasilidade esensiál hanesan mapeamentu, sukat-rai, dezeña mapa, no sofware atu mellora servisu Terra Propriedade iha rejiaun ne’e.

Prezidente Autoridade RAEOA, Arsénio Paixão Bano, esplika, serimónia asina termu entrega fornesimentu materiál ba Sekretáriu Rejionál ba Asuntu Terra Propriedade realiza iha sesta semana kotuk, ho empreza Brother Marnia Unip,Lda, atu mellora servisu diresaun Terra Propriedade nian.

“Fornesimentu materiál esensiál hirak-ne’e atu fasilita servisu tékniku kadastru iha terrenu no materiál hirak-ne’e úniku iha RAEOA maka iha ona fasilidade ne’ebé adekuadu iha kadastru, tanba planu autoridade nian iha tinan ne’e hakarak aumenta fasilidade ba sekretáriu rejionál idak-idak atu mellora servisu di’ak ba Oé-Cusse,” Arsénio Bano, informa ba Agência Tatoli iha Oé-Cusse, kinta ne’e.

Sekretáriu Rejionál Asuntu Terra no Propriedade, António Hermenegildo da Costa, hatete bazea ba pedidu akizisaun ne’ebe Terra Propriedade, submete iha duni rezultadu, nune’e bele fasilita tékniku sira atu halo servisu iha terrenu.

“Ha’u agradese no solisita ekipamentu ne’ebé ita propoin, hetan aprovasaun hosi Presidente Autoridade, no ikus mai iha duni rezultadu, iha semana kotuk ita konsege halo serimónia termu entrega ba ekipamentu hirak-ne’e,” nia agradese.

Membru Autoridade ne’e orgullu ba apoiu tomak tanba durante ne’e Diresaun Kadastru hala’o servisu maibé difikuldade maka ekipamentu mínimu, tán ne’e nia promete ho fasilidade hirak- ne’e sei responde preokupasaun kadastru nian, uza ho kuidadu tanba ne’e sasán Estadu nian.

Fornesimentu materiál maka hanesan peskiza GPS geodetik ho marka GNSS imagine sensor leica GS18 (rover) no materiál eletrónika hanesan drone Jl PHANTOM 4Pro, apple ipad mini R8GB wifi+selulár gold.

Nune’e mós software autocad map 0030 2019/2021, roll meter, batery drone DJI PHANTOM no desktop HP pavilion, laptop marka asus rog, CD autocad 2019/2021 no software arogis.

Fornesimentu materiál hirak-ne’e ezekuta hosi empreza Brother Marnia Unip. Lda ho valór $118,232.51 ne’ebé autoridade RAEOA aloka hosi Orsamentu Jerál Estadu (OJE) 2021, ho durasaun fulan-haat, hahú asina kontratu iha dezembru 2021 to’o abríl 2022.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan