Komisaun Funsaun Públika fó pose ba emposadu nain 5 tuir rejime profesionais seniór iha admistrasaun públika ba tinan 2022 nian. Iha salaun Ministériu Saúde, kuarta (04/05). Imajen Tatoli/Francisco Sony

DILI, 04 maiu 2022 (TATOLI)—Komisaun Funsaun Públika (KFP), kuarta ne’e, fó pose no halo asinatura termu aseitasaun ba profisionál senior administrasuan públika na’in-lima atu redús kontratu asesór internasionál.

Pose ne’e bazeia ba desizaun husi Komisaun Funsaun Públika númeru 9673/2022/PKFP no dekretu Lei númeru 22/2017, 24 maiu kona-ba rejime profisionál senior iha administrasaun públika hodi hetan omologasaun finál.

Biban ne’e, Prezidente KFP, Faustino Cardoso, hateten rejime hirak ne’e nia karaktéristika  atu fó fatin ba eis titulár sira  hodi bele lokaliza  ba servisu apoiu  tékniku  tuir situasaun  kada  ministériu nian ho hanoin ida bele sai  asesór atu estadu bele diminui  tendénsia aproveita  asesór internasionál sira.

Prezidente Komisaun Funsaun Públika (KFP), Faustino Cardoso Gomes. Imajen Tatoli/Francisco Sony

“Objetivu husi dekretu lei ne’e mak hamosu instrumentu hodi atrai no retein kuadru profisionál ho kualifikadu di’ak ho esperensia as, liuliu ba sira ne’ebé mak ezerse ona kargu diresaun durante tinan barak,  maibé oituan de’it mak instituisaun aproveita,” Prezidente KFP hateten iha diskursu pose iha edifisiu MS, Caicoli-Dili.

Rejime ida ne’e ho intensaun atu akumula sira hodi kontinua kontribui no bele responde ba situasaun servisu iha Administrasaun Públika ho sira nia abilidade, koñesimentu, esperénsia sira ne’ebé mak iha  hodi hamenus dependensia ba asesór internasionál.

Relasiona ho proposta husi liña ministeriál 13 ne’ebé mak iha, KFP hamutuk ho painel juri sira mai husi ministériu sira asegura prosesu implementasaun ba rekrutamentu profisionál seniór ba proposta husi área espesializada sira.

Emposada Profesional Senór Grau A area espesializada Jestaun Saúde no Espesializasaun iha Saúde Reprodutiva, Natalia de Araújo. Imajen Tatoli/Francisco Sony

Iha biban hanesan, emposada iha área Profisionál Sénior Grau A eskalaun 1  área  espesializada Jestaun Saúde no Espesializasaun iha Saúde Reprodutiva, Maternu no Infantil, Natalia Araújo , hateten área ida ne’e área espesifiku ida ne’ebé mak iha konesimentu   ne’ebé  mak aas.

“Ha’u-nia esperensia ne’ebé mak durante iha Ministériu Saúde desde 2003 too 2012 nafatin servisu iha área saúde materno infantil no saúde reprodutiva hodi serbí inan no oan iha Timor Leste. Tanba hanesan jerasaun kontinuador hosi ita-nia nasaun  no timor-oan ida idak iha dever  kontribui hodi dezenvolve nasaun atu sidadaun hotu morisa ho saudavél,” nia kompromete.

KFP fó sai konkursu ka vaga hamutuk 16 bazeia ba nesesidade liña ministeriál hanesan Ministériu Saúde vaga 1 ida iha área espesializada Jestaun Saúde no Espesializasaun iha Saúde Reprodutiva, Maternu no Infantil, Ministériu Asuntu Parlamentar no Komunikasaun Sosiál (MAPCOMS) vaga rua  iha área espesializada Koordenasaun ba Asuntu Parlamentar no Jestaun  Administrasaun, Rekursu Umanu, Planeamentu, Institutu  Apoiu ba Dezenvolvimentu Emprezariál (IADE) vaga rua iha área espesializada Formasaun no Jestaun ba Rekursu Umanu no Konsultor Negosiu Ministériu Justisa iha vaga rua  ba área espesializada Inspesaun, Auditoria ka Investigasaun no Jestaun ba Terra no Propriedades.

 Ministériu Planeamentu no Ordenamentu (MPO) vaga rua iha área espesializada Jestaun Aprovizionamentu no Administrasaun, Rekursu Umanu no Lojístika, Ministériu Agrikultura no Peska iha vaga rua ba área espesializada Jestaun Estratéjiku Polítika no Dezenvolvimentu Floresta Komunitária no Jestaun Estratéjiku Polítika no Dezenvolvimentu Peskas no Agrikultura.

Enkuantu Ministériu Negósiu Estrangeiru no Kooperasaun (MNEK) iha vaga ida ba área espesializada iha Jestaun Rekursu Umanu,  Ministériu Administrasaun Estatál (MAE) iha vaga ida ba área espesializada Jestaun ba Lixu, Komisaun Funsaun Públika iha vaga ida  ba área espesializada Dezenvolvimentu Sistema Informasaun.

Ministériu Koordenador Asuntu Ekonómiku iha vaga rua ba área espesializada Makro ekonomia no Instituisaun Ekonómiku Internasionál no Integrasaun Ekonomika no Dezenvolvimentu  Komérsiu OMC no ASEAN.

Emposada Espesializada Jestaun Lixu, Claudina Soares Pinto. Imajen Tatoli/Francisco Sony

Nune’e, KFP hamutuk ho Ministériu sira fó posse ba emposadu na’in lima mak KFP omologa ona hanesan Natália de Araújo nu’udar profisional Sénior Grau A Eskalaun 1 ba área  espesializada Jestaun Saúde no Espesializasaun iha Saúde Reprodutiva, Maternu no Infantil.

Ponciano da Cruz Leite nu’udar Grau A Eskalaun 1 ba área espesializada Jestaun  Administrasaun, Rekursu Umanu no Planeamentu.

Lucas António da Costa nu’udar profisionál seniór Grau A Eskalaun 1 ba área  espesializada Inspesaun, Auditoria ka Investigasaun.

Venêncio Moniz nu’udar profisional Sénior Grau A Eskalaun 1 ba área espesializada Jestaun Administrasaun, Rekursu Umanu no Lojístika.

Claudina Soares Pinto nu’udar Grau A Eskalaun 1 ba área  espesializada Jestaun ba Lixu.

Jornalista : Felicidade Ximenes

Editór    : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here