Prezidente eleitu Jose Ramos Horta halo enkontru ho Embaixadór Repúblika Populár Xina, Xiao Jianguo. iha edifisiu Ramos Horta Farol, kuarta (04/05). Imajen Tatoli /Egas Cristóvão

DILI, 04 maiu 2022 (TATOLI)—Prezidente Repúblika Xina, Xi Jinping, kongratula Prezidente Repúblika eleitu períodu 2022 too 2027, José Ramos Horta, ne’ebé hetan vitória iha eleisaun prezidensiál, 19 abríl.

Karta kongratulasaun ne’e entrega diretamente hosi Embaixadór Repúblika Xina ba Timor-Leste, Xiao Jianguo, iha sede gabinete Nobel Dame, Faról-Dili.

“Embaixadór entrega karta ka dokumentu kongratulasaun ofisiál hosi Prezidente Repúblika Xina, Xi Jinping mai ha’u iha ne’e”, Prezidente Repúblika eleitu, José Ramos Horta, ba jornalista sira hafoin enkontru ho Embaixadór Xina iha Timor-Leste, Xiao Jianguo, kuarta ne’e.

Iha karta ne’e, Prezidente Repúblika Xina mós kompromete kontinua mantein kooperasaun billaterál ho Timor-Leste iha área umanitária, sosiál, ekonomia no seluk tan.

“Ha’u kompromete mós sei kontinua halo diálogu ho lideransa nasionál, Prezidente Repúblika ho Governu oinsá bele apoia no mantein kooperasaun entre nasaun rua ne’e”, nia akresenta.

Horta dehan alende kongratulasaun hosi Prezidente Repúblika Xina, hetan mós kongratulasaun hosi Xefe Estadu nasaun lubuk ida hafoin hetan vitória iha eleisaun prezidensiál.

Iha biban hanesan, Embaixadór Repúblika Xina iha Timor-Leste, Xiao Jianguo, hateten hasoru ho Prezidente Repúblika eleitu José Ramos Horta hodi entrega karta kongratulasaun hosi Prezidente Repúblika Xina.

“Ha’u mai hasoru Prezidente Repúblika, José Ramos Horta, atu entrega mensajen kongratulasaun hosi ami nia Prezidente Xi Jinping ba Prezidente Repúblika eleitu Timor-Leste-nian,” dehan nia.

Biban ne’e, ko’alia mós kona-ba kooperasaun bilaterál Timor-Leste ho Xina ne’ebé la’o kle’ur ona no iha futuru kompromete apoia prosesu dezenvolvimentu Timor-Leste nian.

Jornalista : Natalino Costa  

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here